Ich Leutwein von Sunnenberch unt mein housvrowe Elspet veriehen an disem prief allen den, die in ansehet^a und hor[e]nt^b lesen, das wir meinem sweher hern Rugern dem Pranter unt meiner swiger vrowen Margareten, meiner housvrowen vater unt mu^eter, durch ir no^etdurft haben verhenget hinzegeben ebechlichen daz gu^et ze Goznich mit allem dem rechtê, daz si daran heten, abt Heinrichen unt der samenunge des gotshouses unser vrowen ze Cho^etwige umb fumve unt vierzich phunt phenningê, wand daz selbe gu^et meinem sweher unt meiner swiger, die vorgenant sint, ze widerwechsel wart gegeben von herren Heinrich dem Lichtenstainer wider daz gu^et, daz mein swiger meiner housvrowen mu^eter was anerstorben da ze Schonenstraze unt ze Rotenlaim, unt verzeihen uns mit allen unsern chindelin gutem willen alles des rechtes, daz wir dar[a]n^b heten unt des wir wartund sein gewesen, erbrechtes unt vogtrechts unt daz da[ruber von uns nach]^b von unsern erben, die wir heute haben oder vurbaz gewinnen, dem vorgenantem [abbt und dem]^b gotshouse unser vrowen ze Cho^etwige unt der samenunge chain ansprach noch chain [irrun]ge^b vurbaz widervar, des welle wir des abtes und der samenunge des gotshouses ze Cho^etwige gewer unt scherm sein unt geben in daruber ze stete unt ze urchunde disen prief mit unserm insigel unt mit der herren insingel,^c die an disem prief hangent. Des dinges sint gezeug: her Pilgreim von Chapelle, her Weichart der Heusler, pharrer ze Neleub, der Heinrich der pharrer von Sechsen, her Leutold von Chunring, des gotshouses vogt, her Vlrich von Chapelle, her Ott von Volchenstorf, her Vlrich von Hovs, her Eberhart der Harlunch, her Wernhart von Russpach, her Heinrich von Trovn, her Vlrich von Smida, Chunrat von Chapelle, Wern[h]art,^b Dietrich, Wlfinch die Heusler, Otte, Marchwart von Wildestain, Chunrat unt Leutwein von Hurnpach, Alber und Leutwein von Hurnpach, Chunrat und Vlrich von Fuert, Cholman, Andre Hil[per] ^b unt ander piderwe leutê. Der prief ist gegeben da ze Sunnenberch, da von Chri[sti gepu]rde^b waren tousent iar zwai hunder^d iar unt aines min niwenzich iar an sant [Mauriczen]tag.^b

Source Fulltext: FUCHS, Göttweig I (=FRA II/51, Wien 1901) S. 197-198