Ich Wu^elfinch von Gerlas tun chunt allen den, di nu sint und hernach chu^enftich werdent, daz der erber abbt Heinrich von Cho^etweig hat von mir gelediget di zehent, di ich von dem gotshause ze Cho^etweig han gehabt ze iaren an den steten daze Prukk,¹ daze Temendorf,² in der Alten stat, daze Laevtweins³ und umb Pruk und umb Sand Petronellen, daze Goteinsprunn,⁴ daze Arbaiztal,⁵ daze Regelprunne,⁶ daze Altenburch⁷ und ander zehent, di ich von dem gotshause han gehabt ze iaren, swa si sint gelegen. Darzu hat auch derselb abbt von mir gelediget ein leibgeding, daz ich het an dem zehent daze Shorndorf,⁸ und hat mir umb di ledigung gegeben anderhalb hundert pfunt pfenning und pin auch derselben pfenning shon gewert und verych auch des, daz weder ich noch einhein mein herib nicht rechtes haben an dem vorgenanten zehenten, und ob einhein hantfest fu^erbaz darumb wurd fu^erpracht, daz di nicht chraft hat und enwicht ist, wan allez daz recht geledigt ist, daz ich het an den zehenten. Daz di sache fu^erbaz staet und an chri^eg beleib, darumb han ich gegeben disen brief mit minem insigel ze einem sichtigen urchu^end. Des sint ziug: her Vlrich von Chappell, her Laeutwein von Werde, her Ott der Zelkinger von Shola, her Chvnrat von Shaevrnberch, her Ditrich von Weizzenberch, her Chvnrat von Arnsteyn, her Ott und her Marquart von Wildensteyn, Wernhart, Ditrich und Wu^elfinch von dem Haevslein, her Vlrich von Ritzendorf und ander piderb laeut. Di sach ist geshehen an sand Blasentag daze Sand Po^elten, da von Christes gebu^ert waren zergangen tousent iar zwai hundert iar in dem siben und neunzkisten iar.

Source Fulltext: FUCHS, Göttweig I (=FRA II/51, Wien 1901) S. 220-221