Nos Albertus dei gratia dux Austrie et Stirie, dominus Carniole, Marchie ac Portus Naonis omnibus Christi fidelibus tam presentibus quam futuris notum esse volumus, quod nos abbati et conventui monasterii Gottwicensis hanc prerogativam indulsimus, quatenus in omnibus possessionibus ipsius monasterii tam citra quam ultra Danubium * nullus umquam hominum sub nomine advocati aut iudex vel preco de nostra permissione vel alicuius officii vel iudicii occasione eisdem fratribus iniuriam inferat vel offendere presumat ea videlicet condicione, ut pro iure advocacie ac iustitia nostra * ipsi fratres ducentos modios avene annuatim nobis persolvant. Quod si vero fur vel raptum faciens aut latro in possessionibus ipsorum morte condempnandus deprehensus * fuerit, hunc iudex noster auctoritate propria non usurpabit, sed retentis bonis illum, sicut cingulo accinctus fuerit, nostro iudici homines ecclesie assignabunt. Preterea statuimus, ut predictum pabulum ipsius monasterii nobis porrigendum ante festum beati Michaelis in granario nostro Wienne sub debita Wiennensi mensura recipiamus, ne alicui marschalco eis iniuriam vel dampnum inferendi occasionem tribuamus. Et ut hec nostre devotionis permissio inconvulsa permaneat, presentis scripti paginam subscribimus et sigilli nostri inpressione roboramus. Datum in ipso monasterio anno domini millesimo ducentesimo nonagesimo octavo, quarto nonas martii.

Source Fulltext: FUCHS, Göttweig I (=FRA II/51, Wien 1901) S. 223-224