Ich Arnolt Fritherstorfer, fogt ze den ceiten umb Chotans, unde ich Vlreich Wolferevter, Hainrich der Wunder von Spitze unde Vlreich der Schoebe von Chalchgrveb wir tu^en chunt allen den, di disen brief sechent oder hornt lesen, daz wir verricht unde verschaiden haben den chrieg, der zwishen vron Geiseln der Vdelpoltinn unde ir ennichlein Hainrichen auf dem hof ze dem Levpolts her gewesen ist also, daz Hainrich seiner anen den hof pawen shol umb halbz und shu^ellen auch nur in den ainen hof mit einander wandeln ze ainem tore auz unde ine, unde shol Hainrich den hof ze aller zeit mit fride bewarn unde shol auch der fride abgen, do er sich mit auzgefrit hete, darzuo shol er den hof verrichten mit alm pawe an all ir mue, nu^er halben samen shol si ime darzuo gebn unde ze heugen unde ze ausfachen unde ze allm treide fessen drei Shilling alter Wi^enner phenning unde shol si anders dermit nicht ze schaffen haben, nur swann iz an di scho^eber chumt, so shol er hewe und getraide auf dem velde shon mit ir tailn unde shol dann ir tail nicht lenger auf dem velde beleiben nur untz an den dritten tach. So shol er ir iz, ob man vor ungewiter mag, shon geantwurten in ir stadel, e er daz seine indert gerure, an ir zechent schol er ir shon auz von dem seinem legen, den shol si selber fessen. Si shu^ellen auch besunder etze nicht enhaben, nu^er Hainreich shol ein juchart zenost dem hof pawen, do ir paider fiech von geetzet werde. Auch shol er mit ir holden an ir Urlaub nicht ze shaffen haben, er shol sei auch witten ze alle, deu unde si in dem hof bedarf an so viel, ob er wite muest chawffen. In dem chauf shol si den dritten phenninch geben unde der wite und allz daz, als iz an dem brief verscrieben stete der vorgenanten vron Geiseln, an alle ir mue shol daz in ir hof von dem egenanten Hainreichen ir enen shon geantwu^ert werden, als er ir des pilleich ist shudich,^a wannt si im getreulich hat getan, auch shol si ir purchrecht selb raichen, swelchz under in di shidung, als iz an dem brief stete, nu pricht, daz shol von dem andern den shidleuten chunt werden getan, uberwernt di shidleute dazselb desselben nur ainges gedagen des andern, der ist shuldich mein herren dem apt fumf phunt, meinem herren von Chvnring fumfeu, den shidleuten echteu, der ein phenninch nimmer gelazen wirt. Der brief ist gegeben nach Christes gepurde uber dreutzechen hundert iar unde in dem fu^emf unde zwainzgististen iar an sand Michelsobent.

Source Fulltext: FUCHS, Göttweig I (=FRA II/51, Wien 1901) S. 316-317