Nos Wilhalmus divina miseracione decanus et plebanus in Pylichdorf Pataviensis dyocesis presencium inspectoribus innotescimus universis, quod ob anime nostre ac omnium progenitorum nostrorum singulare remedium bona nostra subscripta ac empcionis iusto tytulo adepta videlicet beneficium quondam Leonis de Grauenwerd situm in Gu^epling¹ iuxta Sanctum Ypolitum, de quo coloni Hermannus et Petrus in eo residentes annis singulis in festo beati Georii dimidium talentum denariorum Wiennensium et in festo beati Michahelis archangeli quintum dimidium solidum denariorum Wiennensium iure civili tenentur deservire, cum omnibus iuribus ac pertinenciis suis proprietatis iure, quo ipsi hucusque possedimus, plene ac integraliter, sponte et cum bona deliberacione tradidimus seu donavimus ad oblagiam honorabilium et religiosorum virorum, abbatis et conventus monasterii Chotwicensis ordinis sancti Benedicti supradicte dyocesis perpetuo deservienda tali pacto, quod singulis annis nobis adhuc in vita existentibus sequenti die post festum beati Michahelis, que feriata non fuerit, post mortem vero nostram die anniversario deposicionis nostre vigilias missarum sollempnia ac alia oracionum suffragia in conventu suo perpetuo devote peragant, quemadmodum uni ex fratribus in dicto suo monasterio actenus^a peragere consueverunt statuentes, ut si quando conventuales supradicti in exequendis iam dictis exequiis inventi fuerint negligentes, abbas, qui pro tempore fuerit, supradictos redditus tamdiu percipiat, donec ad se reversi peniteant ac ampliori devocione perficere studeant, que neglexerunt, et ut hec rata maneant perpetuo ac inconvulsa, presentes nostras litteras tradidimus sigilli nostri appensione communitas. Datum anno domini millesimo trecentesimo tricesimo septimo in die beati Laurencii martiris in civitate Ypolitensi.

Source Fulltext: FUCHS, Göttweig I (=FRA II/51, Wien 1901) S. 375