Ich Chunigunt, Chu^enrats wytib des Hodentropleins, dem got gnad, vergich und tu^en chund mit disem bri^ef allen den, di in lesent oder horent lesen, daz ich nach rat und mit gunst und willen aller meiner eriben und naster und pester vreunt ze der zeit, da ich iz wol getu^en mo^echt, durich rechts gelts no^et willen, da mich mein egenanter wi^ert inne ze gelt li^ez mit gesampter hant, daz er verzert het in dem sy^echpett, recht und redleich verchauft und geben hab mit fu^erzicht und mit meins perchherren hant hern Nyclos ze den zeiten pharrer ze Chirichling mein halbz jeuch weingarten, gelegen in dem v^elleingraben¹ zenast dem Abptsdorfer, da man alle iar von di^ent der pharr ze Chirichling ze perchrecht ain halben emmer weins und ain phening ze voytrecht und ze uberzins a^echzechen schilling Wi^enner phening geltes in daz wrow^enchloster ze Nevnburch abzelasen mit drithalben und zwainczich phunt und mit dem di^enst, alz i^er bri^ef sagent, di wi^er darauf verchauft haben mit gesampter hant, wand wi^er denselben weingarten gechauft haben mit gesampter hant umb unser paider aygenleich varund gu^et nach der zeit, und er recht und redleich mit fu^erzicht getailt het mit seiner steuftochter Elzpeten, Hainreichs hauswrow^en des Hu^etstoches, alz der tailbri^ef sagt, und diselb uberteurung uber di a^echzechen schilling geltes auf dem obgenanten weingarten hab ich verchauft und geben um naunzechenthalb phunt Wi^enner phening, der ich gar und gancz hincz den geltem verricht und gewert pin, dem erbern mann Gerungen dem Weinschenchen und Marigreten seiner hauswrowen und i^er paider eriben furbaz vreileich und ledichleich ze haben und allen i^ern frum damit ze schaffen mit verchauffen, mit verseczen und geben, swem si wellent an all irrung. Auch secz und pint ich mich egenanteu Chunigunt mit sampt mein eriben fu^er deu obgenant uberteurung des obgenanten weingarten dem vorgenanten Gerungen und Marigreten seiner hauswrow^en und i^er eriben ze rechtem gewer und scherm fu^er all ansprach, alz perchrechts recht ist und des lants recht in o^esterreich. Ist aber, daz seu furbaz mit recht dhainerlai chri^eg oder ansprach daran gewunnen, von swem daz geschech, daz sol ich in auzrichten an allen i^ern schaden. Tet aber ich des nicht, waz seu dann mit recht furbaz daran schaden nemen, den i^er ains ungeno^ett pei sein treun gesprechen mag, den sol ich in ablegen gar an all chlag und widerred und sullen seu daz haben auf mi^er und auf allem meinem gu^et, daz ich hab unverschaidenleich, ich sei lembtig oder to^ed. Und daz diser chauf und scherm furbaz stet beleib und unzebrochen und auch selb nicht insigel hab, darum so gib ich in diesen bri^ef ze einem woren u^erchu^end versigelten mit des egenanten gruntherren insigel hern Nyclos pharrer ze Chirichling, des ich in gepeten hab. Des sind auch gezeug mit i^ern insigeln di erbern laut: her Gundolt der Tucz, Jeorig des Chu^ersner aydem und Vlreich der statschreiber, des ich seu gepeten hab, wand in di egescriben red und wandlung wol chund und gewizzen ist. Der bri^ef ist geben nach Christ gepu^erd dreuzechen hundert jar darnach in dem dreu und fumfczygisten jar ze phingsten.

Source Fulltext: FUCHS, Göttweig I (=FRA II/51, Wien 1901) S. 473-474