Ich Hainreich von Velben und mein hawsfraw und all mein erben veriechen und tun chund allen den, dy disen bri^ef ansehent oder horent lesen, daz ich mit wolbedachtem mu^et und mit gu^etem willen han geben unser frawn goczhaws ze Stuluelden in dew phru^ent mein wisen nider Vtendorff gelegen auf der Plu^emaw^e, dew mir ledig ist worden mit dem tode von der Weissin und von iren erben mit allen eren rechten nuczen und gesuchen, und zu der wisen geho^ert und wy ez genant ist, fu^er dy ansprach, dy her Chunrad der pharrer ze Stuluelden von derselben seiner chirichen wegen hat gehabt hincz Fridreich dem Ma^eglein umb daz selgerat und geschaft, daz Niclein der Ma^egel sein pruder, dem got genad, an seinen lesten zeiten tet dem vorgenanten goczhaws ze Stul(uelden) auf der Swaig gelegen in dem Puchlach, in dem Leuchental pey Chiczpuchel und dyselb wisen hat mir Fridreich der vorgenant Ma^egel widerlegt mit aim gut gehaizzen daz Nider Aygen an dem Schaufelperg in dem Chaprunne. Auch han ich dew vorgenant wisen dem egenanten goczhaws geben fu^er rechcz und ledigs aygen m rechter selgra^ecz weise und han mich und alle mein erben aller ansprach und rechtes darauf verczigen und pin auch ich dez dezselben goczhaws gewer und vertreta^er an aller stat, als aygens und des lancz recht ist. Ta^et ich dez nicht, daz sol der pharrer und daz goczhaws ze Stul(uelden) haben auf meiner trewn und auf aller meiner hab. Der tayding sind zeugen: her Nicla der Holerspekch, Fridreich von Awn ze den zeiten richter ze Mittersil, Hainreich Swaiger von Lapach und ander erber lawt genug. Daz in dy tayding sta^et vest beleiben, daruber gib ich in disn offen briff versigelt mit meim anhangunden insigel und unter dem meines pru^eder hern Eberharcz alles daz sta^et ze haben, daz oben verschriben ist. Der bri^eff ist geben, da man zalt von Christ gepu^erd drewczehen hundert jar darnach in dem fünf und funfczigisten jar an dem auffarttag.

Source Fulltext: FUCHS, Göttweig I (=FRA II/51, Wien 1901) S. 486-487