Ich Jans von Haslaw^e und Agnes mein hausvrow^e und alle unser erben veriehen offenleich an disem prief allen den, di in sechent lesent oder horent lesen, di nu lebent oder hernach chunftig werdent, daz ich mit dem erbern und gaestleichem herren abt Dy^etreichen ze Chotwi^eg noch der erbern leut spruch, den seu von i^ern trewn gesprochen habent, Nycla des Pehaem von Regelprunn und Jansen von Go^eteinsprunn¹ uberain sein chomen umb di dreu lehen, di gelegen sint datz Go^eteinsprunn, umb allez das vogtrecht, daz ich und mein erben dorauf haben, und umb allez daz purchrecht, daz er und sein gotshaws dorauf hat, also daz ich vorgenanter Jans von Haslaw^e oder wer der egenanten lehen vogt noch mi^er ist, nicht mer rechten noch vodrung sol haben denn nu^er sein vogtrecht, als daz hye geschriben ist: alle iar an sand Giligentag von igleichem lehen fumfczehen meczen habern mit gemainer mozze und an sand Mychelstag aecht und vierczich pfenning gemainer Wienner munizz und nur gemaine fu^er als mein holden in demselben dorf und hab awch recht mit dem abt ze stiften und leihen ainem gemainem lantsezzen an allez gever und sullen awch in mein pantaydinge gen und unczucht mi^er noch gnaden pezzern als mein holden. Ich gehil awch dem vorgenanten herren abt Dytreichen und seinem gotshaws ir^es purchrechts, daz man alle iar dovon dinet an sand Merteinstag von Chunrats des Obermans lehen fumf und ain halb pfunt Wienner pfenning und von Chunrats des Achter lehen alsvil auf denselben tag und von Chunrats des Visschemunder lehen fumf und drey schilling Wienner pfenning auf denselben tag und nicht mer. Und daz ich oder wer der egenannten lehen vogt noch mi^er ist, furbaz chainerlay gevodirn mugen denn nur unser vogtrecht, dorumb gib ich vorgenanter Jans von Haslaw^e dem egenanten herren abt Dytreichn und seinem gotshaws disen prief versigelten mit meinem anhangunden insigel und mit der erbern chnecht insigel Nycla des Pehaem von Regelprunn und Jansen von Goteinsprunn, di diser sache geczeug sint mit ir^en anhangunden insigeln. Diser prief ist geben, do man zalt von Christes geburd dreuczehen hundert iar dornach in dem sechs und fumfczigisten iar an gotsleychnamstag.

Source Fulltext: FUCHS, Göttweig I (=FRA II/51, Wien 1901) S. 494-495