Ich Weichart von Toppel, hofrichter in O^esterreich, vergich, daz fu^er mich cham in daz hoftaiding, do ich sas an einem rechten, der geistleich herr, her Symon, probst datz Stain, und chlagt mit varsprechen an seiner herren stat, hern Dyetreichs abt datz dem Cho^etweig und des convent daselbs hintz Jansen dem Vêlebrvnner, daz er in ir^en zehent ze Velebrunn¹ von suben lehen und von aller ir weinwachs daselbs innehiet mit gewalt, des si enkolten habent umb dreizzig phunt Wienner phenning, und chlagt daz als lang hincz im, u^encz daz er im vro^ent alleu seine gu^eter gelegen zu Velebrunn und ein holcz, daz da haist di Reingru^eb² und daz Hessholcz, und nam auch daz ze rechten têgen aus der vron, als er ze recht solt. Darnach in dem nasten hoftaiding cham er aber fu^er recht und pat vragen mit varsprechen nach der vro^en, waz nu recht wêr. Do ertailten di lantherren und geviel im auch mit vrag und mit urtail, seid der vargenant Jans der Velebrvnner noch sein anwalt noch niempt nicht enantwu^ert wêr, und di vargeschriben gueter nicht verantwu^ert hiet nach der vro^en, als er ze recht solt, man solt den egenanten herren Dietreichen abt datz dem Chotweig und den convent daselbs der vargeschriben gueter gewaltich machen und an di gewer setzen innzehaben und allen ir^en frum damit ze schaffen so lang, u^entz daz sie der vargeschriben dreizzig phunt Wienner phenning gar und gênczleich davon verricht und gewert werden, und sol daz auch mein herr der herczog darauf schi^erm oder swer an seiner stat gewalt hat in dem land ze o^esterreich. Mit urchund des priefs, geben ze Wyenn des mitichens nach dem prehentag anno domini MCCCL septimo.

Source Fulltext: FUCHS, Göttweig I (=FRA II/51, Wien 1901) S. 496