Ich Hainreiche von Velben und mein hausfrow^e und unser erben verjechen offenleich an disem prief und tun chunt allen den, die disen prief ansechent oder ho^erent lesen, daz wi^er u^enz mit wolbedachtem mu^et und nach gutem rat freuntleiche han bericht und vertaidingt mit meinem liben vettern hern Ulreich und seinem pruder Chunrat und allen iren geswistreiden umb alle die ansprach vodrung und handlung, die wir gegen ainander ze sprechen und ze fodern haben gehabt, von welherlay sachen daz ist gewesen, huncz auf den heutigen tach mit sotaner beschaiden, waz die erbern leut Hainreich der Preisinger von Woltsach, herr Hanse von Goldek, Ortolf der Layminger, her Lienhart vom Turn, her Fridreich pharrer und probst ze Zelle, her Chunrat, pharrer ze Stuluelden, Ulreich der Nusdorfer, Haidel von Celle, Hainreich von Sulczaw^e zwischen unser sprechent auf den naechsten suntag nach dem auferttach, der nu^e schi^erst chi^empt, dacz Celle, den wi^er unz mit veraintem mut genom haben an dew selben stat umb alle handlung auflauf vodruge^a und ansprache in aller der mazze, alz iz an sant Jo^ergen abent, der naechst ist gewesen, dacz Mittersil getaidingt ist und sein auf demselben Spruche gar und gancz freunt worden an allez gevaer und an alle sache. Waer aver, daz unz der unz der vorgenanten spruchleuth ainer oder mengar abgieng angevaer, so schullen wi^er alz maingen nemen an derselben stat mit veraintem mut. Mocht aver unser ainer von ehafter not, die er ze liecht mo^echt pringen mit der warhait, dez sol er und der gegentail nicht engelten an sein rechten, und su^ellen auch ain andern tach in derselben weisse stozzen aver angevaer. Waer aver, daz ich den vorgenanten tach saumpt mit mu^etwillen oder mit gevaer, so habent si vollen gewalt mich ze fodern gaen Celle in ze laisten in ain offens gasthauzz mit zwain phaerden und schol ich in daz volfu^eren an allez verziehen in aller der mazze, alz leistenz recht ist, und nicht auzchomen, huncz in allez daz volfu^ert wirt, daz getaidingt und oben gemelt ist. Daz in daz staet und unzebrochen beleibe, darüber gibe ich in disen offen prief ze zeug der warhait versigelt unter meim anhangent insigel. Der prief ist geb^en, do man zalt von Christ purt dreuzehen hundert jar darnach in dem aecht und funfczigisten jar an sant Jo^ergentach.

Source Fulltext: FUCHS, Göttweig I (=FRA II/51, Wien 1901) S. 506-507