Ich Nyclas der Styller und Gedraw^et di Haesibynn und Elspet di Grw^enpuchlynn und Erndraw^et all drey mein swestern und ich Seyfrid der Haesyb und Wandelmu^et mein hauswraw^e und all unser eriben wi^er veriehen offenleich an dem brief allen den, di in sehent lesent oder ho^erent lesen, daz wi^er unbedwunnichleich und mit gu^etleichem willen gegangen waren hynder hern Wernharten den Druchsetzzen von Reycherstorf und hinder hern Jo^erigen von Go^etzzestorf, di zeit lantrichter auf dem Tvlnnerveld an unserm tayl. Dogegen heten geno^emen der erber geystleich herr, her Jans di zeit abt ze Cho^etweyg und der convent doselbs hern Go^etfriden den Sebechen und Nyclasen von Brv^enn,¹ di zeit rychter ze Mavta^ern, an dem andern tayl umb alle die chrieg und anspruch und vo^edrung, di wi^er gehabt haben hintz dem vorgenanten geystleichem herren und dem convent umb ein viertail zehentz, der do gelegen ist in der gegent ze Welmch,² und ein viertail zehentz auz einem andern viertail gelegen doselbs ze veld und ze dorf chlainner und gro^ezzer, den her Dietreich di zeit abt ze Cho^etweyg abgelo^eset hat von Chadolten von Noppendorf und von seiner hausvraw^en Lew^etgarten und von ir^en eriben, der von dem egenanten go^etshaw^es ze Cho^etweyg pu^erchrecht ist und auch aygen desselben gotshaw^es also beschaidenleich, waz di vier spraechen, daz schölten wi^er alles stet haben, ez waer mynn oder recht. Waer auch daz, ob der egenanten schydmann ayn icht i^erricht, so mo^echt yetwerdertail ein andern wol an sein stat nemen, als die spruchbrief sagent, di wi^er ze bayder seytten doruber geben haben. Do i^erracht den vorgenanten hern Wêrnharten den Druchsetzzen ehaft no^ett, daz er bey dem vorgenanten spruch nicht gesein mo^echt, do no^emen wi^er an sein stat den erbern chnecht Lebeynn hern Chu^enratz bru^eder von Vrew^entzhavssen.³ Nw^e geschach daz also, daz sich di vorgenanten vier auf ein gantz ende und vollichleich nicht gesammen mo^echten, daz si mit einander geholn hyeten. Do cho^emen dornach der erber vorgenant her Wernhart der Druchsaetzz und Nicla von Brw^enn,¹ rychter ze Mavta^ern, und sprachen uber die vorgenanten zehent vollichleich und gaentzleich auf ein gantz end noch unser bett und mit unser aller gu^etleicher gunst und willen und als si auch wol getw^en mo^echten noch den vorgenanten spruchbriefen, und habent gesprochen also, daz wi^er all die vorgenanten Nyclas der Styller und Gedraw^et di Haesybinn und Elspet di Grw^enpuchlynn und Erndraw^et und Seyfrid der Haesyb und Wandelmu^et sein hausvraw^e und all unser eriben, di nw lebent oder hernach chu^emftich werdent, fu^erbaz chayn zu^eversicht noch dhaynnen anspruch noch chaynnen chrieg nach den vorgenanten zehenten, er sey chlayner oder gro^ezzer, ze veld oder ze dorf, benant oder unbenant, besuecht oder unbesuecht nymmer ewichleich gehaben schullen. Und dorumb schol uns geben der vorgenant eriberiger geystleich abt Jans ze Cho^etweyg oder sein nocho^emen aecht und zwayntzzikch phunt phenning Wyenner munizz unverzogenleichen an all wyderred auf sand Merteinstag, der nw schi^erist chumpt, und schullen uns auch der vorgenant herr abt Jans ze Cho^etweyg oder wer do abt ist, des vorgenanten zehentz ze hant underwynden mit allen nutzzen und innemen ym und seinem gotsha^ews mit unserm gu^etleichem willen und an all unser widerred. Und waz im doruber und seinem vorgenanten gotshaw^es chrieg oder stozze an den vorgenannten zehenten von uns oder von unser eriben wegen mit recht auferstuenden, daz schul wi^er in richtig machen oder waz si des schaden nemen, den schul wi^er in ablegen gantz und gar und schullen si daz haben auf uns und auf aller unserer hab, di wi^er haben versuecht oder unversu^echt auf lant, auf wazzer in dem lant ze o^esterreich oder wo wi^er sey haben, wi^er sein lebentyg oder to^ed. Und daz allez daz vorgeschriben stet, staet und untzeprochen beleib, doruber gib ich vorgenanter Nyclas der Styller und mein o^ehem Seyfrid der Haesyb den brief versigelten mit unser bayder anhangunden insigiln, dorunder sich verpindent Gedraw^et di Haesybinn und Elspet di Grw^enpuchlynn und Erndraw^et und all unser eriben, allez daz staet ze laisten mit unsern trew^en, daz vor geschriben stet, an allez gever. Und zu ainer pezzern sicherhait haben wi^er gebetten den erberigen rytter hern Wernharten den Druchsetzzen von Reycherstorf und hern Chv^enraten von Vrevntzhavssen und den erbern chnecht Reynboten den Frael von Prv^enn1 und Nyclasen von Brw^enn,¹ di zeit rychter ze Mautarn, daz di irew^e insigil zu einem zeug und zu einem warn u^erchu^end der sach an den brief gehangen habent in selber an schaden. Der brief ist geben nach Christi gepu^erd dreutzzehen hundert jar dornach in dem sechtzkistem jar des su^enntags ze mittervasten.

Source Fulltext: FUCHS, Göttweig I (=FRA II/51, Wien 1901) S. 514-516