Ich Perchtolt von Pergaw^e, hofrichter in Österreich, vergich, daz für mich cham, do ich saz an dem rechten in der hofschrann ze Wienn, der erwirdig geistleich herr, abt Ott von Zwetel und chlagt mit varsprechen hintz dem erwi^erdigen geistleichen herren abt Johannsen von Chotweig, daz im von seins geschefts wegen funf hundert stêm velber pei der erd abgehokcht wer und auch einswercz bei Chrems entwurt mit gwalt, des er engelten hiet umb dreizzikch phunt Wienner phenning und chlagt das als lang nach der pizaig unczen des vorgenanten abt Johans nachchome abt Vlreich mit im auf ebenung cham mit des gerichtz urlaub. Diselb ebenung ward do verzogen und vergieng sich nicht, als si sich ze paider seit versprochen heten, darnach in dem nasten hoftaiding chom des vorgenanten abt Vlreichs anwalt fu^er recht und wolt di egenanten ansprach und chlag verantwurt haben, als er ze recht solt. Do chom niemant von des egenanten abt Otten wegen von Zwetel, der di egenanten chlag volfu^ert hiet, als er ze recht solt. Do ertailten di herren und geviel auch do mit vrag und mit urtail, es solt der egenant abt Vlreich von Chottweig des obgenanten gwaltz furbaz ledig vrey und beru^ebt sein. Mit urchund des priefs geben ze Wienn an mitichen nach dem prehentag sexagesimo primo.

Source Fulltext: FUCHS, Göttweig I (=FRA II/51, Wien 1901) S. 520-521