Wir Vlreich von gots genaden abt unser vrawn gotzhaws ze Chotweig und wir der gantz convent gemain doselbs vergehen offenbar mit dem gegenwu^ertigen brief und tu^en chunt allen den, di in ansehent lesent oder ho^erent lesen, di nu lebent oder hernach chumftig werdent, daz wi^er mit wolverdachtem mu^et und auch durich no^eturft willen unsers gotzhaw^es von der stewr wegen, di unser gnadiger herr hertzog Albrecht von o^esterreich auf unser gotzhaws gelegt hat, recht und redleichen verchawft haben unser rechten chawffaygen gueter di zwen hof gelegen in Hofsteter pharr, di wir gechawft haben umb unser aygenhaft gu^et von den erbern lewten von Maricharten von Mechters und von Weycharten von v^etelndorf, als di chawfprief sagent, di wi^er von in doruber haben, unserm lieben andaechtigen mitbru^eder bru^eder Gundakchern von Vrewntshawsen und Volchweinn seinem vetter von Tewrn und seinen eriben zu dem ersten den hof, der do leit an dem Aertzperig^e dorauf di zeit gesezzen ist Vlreich der Ramler, dovon mon alle iar dint ain halbez phunt Wy^enner phenning an sand Jorgentag und sechtzig phenning an sand Mychelstag und des suntags in den vi^ertagen in der vasten aecht und vi^ertzig phenning und zu weychnachten vier und sechtzig phenning fur vier Rabenstainer chês und zu o^estern vier und sechtzig phenning fur vier Rabenstainer chês und zu phingsten vier und sechtzig phenning für vier Rabenstainer chês und den andern hof gelegen an dem Plampachekk¹ an des Mertzen stat und leit zwischen des Mainberger hof, der weiln Phylippes des Richter gewesen ist, und zwischen Hainreichs lehen, der nunnen hold von Ybs, dorauf di zeit gesezzen ist Eberhart, dovon von^a mon alle iar di^ent ain halbez phunt Wy^enner phenning an sand Jorgentag und ain halbz phunt phenning an sand Mychelstag. Di vorgenanten ho^ef mit allen den eren rechten und nutzen, di dorzu gehorent, ez sey ze holcz wismat ze veld oder ze dorffe, gestift oder ungestift, versu^echt oder unversu^echt, swie so di genant sind, und als wi^er si in aygens gewer herpracht haben, di haben wi^er ze chawffen geben unserm vorgenanten mitbrůder bru^eder Gundakchern und Volchwein seinem vettern und seinen erben umb vi^ertzikk phunt gemainer Wy^enner phening, der wi^er gantz und gargericht und gewert sein zu rechter zeit und zu rechten ta^egen. Di vorgenanten gueter habent si uns und unserm gotzhaws herwider geben zu einem ewigen selgerêt allen gelaubigen selen und auch durich aller ir^er vodern selhail willen und besunderleich durich hern Chu^enrat^es und hern Leben von Vrewnthausen bayder bru^eder selhail willen. Zu den ersten mal den hof an dem Aertzperig, dovon mon alle iar dint vi^ertzehen schilling phenning, als vor geschriben stet, habent si geben in unser gustrey gen Chotweig zu einem ewigen ly^echt, daz do prunnen sol in sand Benedicten chappellen nacht und tag ewichleich, und sol auch des vorgenanten hofs ain guster Stifter und sto^erer sein und dem sol zu ablait und zu anlait dovon gevallen, als ez von alter herchomen ist. Den andern hof an dem Plambachek, der do di^ent ain phunt phenning, als vor geschriben stêt, den habent si uns geben in unser oblay zu ainem ewigen jartag, den mon alle iar begen schol des nachsten tages nach sand Cholmanstag des nachtes mit vigilii und mit dem gelewt und des margens mit dem selampt, als gewo^enleich und sitleich ist in unserm gotzhaw^es ze Chotweig, und sol auch des vorgenanten hofs ein oblaymaister stifter und sto^erer sein und dem sol ze ablait und ze anlait dovon gevallen, als ez von alter herchomen ist. Wir sullen auch noch unser gotzhaws von den vorgenanten gu^etern dhain stewr nicht nemen nur alain, ob daz wer, daz der hertzog ain gemaine stewr auf unser holden legt, so sol der hof an dem Aertzperig viertzig phenning ze stewr geben und der hof an dem Plampachek zwaintzig phenning und nicht mer. Und daz der chauf und daz selgeret furbaz also staet und unczerbrochen beleib, doruber gewen wi^er den brief versygelten mit unsern bayden anhangunden insygeln. Der prief ist geben nach Christi gebu^ert tawsent iar drewhundert iar dornach in dem newn und sechtzigisten iar an sand Luceintage.

Source Fulltext: FUCHS, Göttweig I (=FRA II/51, Wien 1901) S. 589-591