Ich Hainreich der Haêwslaêr von Saêserndorf und ich Marichart der Haêwslêr sein sun und ich Agnes [sein]^a housvrow und alle unser erben wi^er vergehen und tun chunt allen den, die den brief lesent oder ho^erent lesen, die nu lebent und h[ernach]^a chunftig sint, das wi^er mit gu^etem willen mit wolbedachtem mu und mit gesampter hant und nach rat unser frêwnde zu der zeit, do wi^er es wol getu^en mo^echten, verchoufft haben unsers rechten aigens sibenthalb phunt und drei und zwaintzig phenning Wienner mu^enzze geltes gelegen in Haynveldêr pharr und in Veytingêr pharre ouf bestifften und behawsten gutern, als si hernach an dem brief benant sint: von erst ouf dem hof gelegen in der Ramsaw genant ouf der Schanleytten¹ viertzehen Schilling geltes minr zwen phenning und zwelef phenning für einen hasen und ouf einem hof doselbens, der genant ist der Nider Ho^ehenperkch² newn schilling und acht phenning geltes auf einer hofstat genant ouf der Chru^ekchen dreizzig phenning geltes, auf einem hof genant in dem Vaêwchtental acht und zwaintzig phenning geltes, ouf einem hof genant in dem Obern Lyndekke drey und zwaintzig phenning geltes, ouf einer hofstat genant in dem Nidern Lyndekke dreitzehen phenning geltes, ouf einem hof gelegen ouf dem Chawnperg genant der Enynkchelhof drey Schilling geltes, doselbens ouf einem hof genant an dem Svmpperhof³ drey und sechtzig phenning geltes, ouf einem hof genant der Ober Getzhof drey und sechtzig phenning geltes, ouf einem hof gelegen ob Ro^erbach haizzet der Herbsthof⁴ ain phunt und zwaintzig phenning geltes, ouf einem hof gelegen in dem Cherspawmpach genant im Erlaêch⁵ sechtzig phenning geltes, ouf einem gu^et in dem Phenichpach⁶ genant in der Hofstat ainen und dreizzig phenning geltes und auf einem hof gelegen in dem Wisenpach genant an dem Pu^echperg siben Schilling und vier phenning geltes und unser zwen lu^ezz holtzes, den mittern tail gelegen an dem Mos mit grunt mit alle. Die vorgenanten sybenthalb phunt und drey und zwaintzig phenning geltes auf den obgenanten gu^etem und ouf alle dem, das dartzue geho^eret, es sey holtz wayd wismad paw, gestifft oder ungestifft, versu^echt oder unversu^echt, wieso das genant ist, haben wi^er mitsampt den egenanten zwain lu^ezzen holtzes mit grunt mit alle recht und redleich verchoufft und geben mit allen den nu^etzen ern und rechten, als wi^er und unser vordem das alles in aigens gewer herpracht haben, umb hundert phunt und umb zway und fu^emftzig phunt Wienner phenning, der wi^er gantz und gar gewert sein, den erbern lêwten Hannsen dem Têwfel, Hannsen dem Richtêr ze Haynvelde, Lêwtolten dem Hetzel und Hainreichen dem Chramêr purgêrn doselbens und allen iri^en erben und den pharrlaêwten gemaine doselbens ze Haynvelde, die die vorgenanten gu^elt und gu^eter gechoufft habent zu sand Andres gotzhows doselbens ze Haynuelde zu einer ewigen fru^emesse also, das si dieselben gu^elt und gu^eter sullen fu^erbas ledichleich und freyleich haben und allen ir^en fru^emen damit verchouffen versetzen und geben, wem si wellen, an allen irr^esal und sein ouch wi^er und alle unser erben unverschaidenleich der vorgenanten gu^elt und gu^eter mit aller i^erer zugeho^erung, als vor geschriben stet, der obgenanten Hansen des Têwfels, Hansen des Richter, Lêwtolts des Hetzels, Hainreichs des Chramêr und aller i^erer erben und der pharrlewt gemaine doselbens ze Haynveld recht gewern und scherm fu^er alle ansprach, als aigens recht ist und des landes recht ze o^esterreich. Wêr aber, das in an den vorgeschriben gu^elt und gu^etem icht abgieng mit recht oder ob si icht chrieges oder ansprach daran gewunnen, von wem das wer mit recht, swas si daz schaden nement, das sullen wi^er in alles ausrichten und widerchern an allen ir^en schaden und sullen ouch si das haben ouf uns unverschaidenleich und ouf allem unserm gu^et, das wi^er haben in dem lande ze o^esterreich oder wo wi^er es haben, wir sein lebentig oder tod. Und daz der chouf fu^erbas also stêt und untzebrochen beleib, daru^eber so geben wi^er in den brief fu^er uns und fu^er alle unser erben zu einem warn urchunde und zu einer êwigen vestigung der sach versigilten mit meim obgenanten Maricharts des Haêwslaêr angehangem insigil und mit meins vettern insigil Jo^erigen des Haêwslêr und mit unserr o^ehaymen insigilen hern Hannsen von Maynberkch und Hannsen von Plankchenstain, die wi^er des vleizzichleich gepeten haben, das si der sache getzêwgen sint mit ir^en angehangenen insigilen, und verpinde ich mich obgenanter Hainreich der Haêwslêr under der vorgenanten insigilen mit meinen trêwn an alles gevêr alles das stet ze haben und ze laisten, das vor an dem brief geschriben stêt, der geben ist nach Christes gepurde drêwtzehenhundert iar darnach in dem vier und sybentzgistem jare an unser frown tag ze der liechtmesse.

Source Fulltext: FUCHS, Göttweig I (=FRA II/51, Wien 1901) S. 611-613