Wir Vlreich von got^es gnaden abpt unser vraw^en gotzhaws ze Chotweig und der gantz convent gemaine desselben gotzhaws vergehen für uns und fur all unser nachkomen und tu^en chunt offenleich mit dem brief allen lewten gegenwu^ertigen und chumftigen, daz unser getrêwr dinaer Haymel di zeit gesezzen auf dem Aygen under dem Chotweig und vraw^e Chunegund sein hausvraw^e und ir erben gechawft habent ain lehen von uns und von unserm gotzhaws, daz do leit ze Fu^ert perigshalben an dem Chotweig, umb zway und dreizzik phunt gemainer Wy^enner phenning, der wir gantz und gar gericht und gewert sein, und daz emaln gewesen ist Jansen des Chamrer von Fu^ert und seiner erben und daz uns alle jar gedint hat in unser oblay gen Chotweig sechtzik Wy^enner phenning ze rechtem pu^erchrecht an sand Mychelstag und dreizzig metzen vogthabern mit gemainer Fuertermazz dem herczogen an di Tunaw^e und zehen phenning auf habern und nicht mer, weder fuer noch stewr noch chain ander vodrung. Mon geit auch nicht zehent von alle di, und in daz vorgenant lehen von alter geho^ert hat, und swaz auz dem vorgenanten lehen ze pu^erchrecht verchauft ist, daz raichet auch den zehent hinwider in und di vorgeschriben wandlung. Und auch den chawf haben wir bestaetet mit unsrer hant und alten prief vernewt und haben dem egenanten Haymlein und seinen erben daz vorgenant lehen ze Fu^ert mit alle di, und dorzu^e geho^ert ze veld und ze dorffe, gestift oder ungestift, versu^echt oder unversu^echt, swie so daz genant ist, gelihen ze rechtem pu^erchrecht mit dem di^enst und mit allen den rechten, als ez von alter herchomen ist und auch vor geschriben stet. Und durich pezzerr gelegenhait willen habent seu gechauft in demselben dorffe unser oblayhaw^es gelegen zenaechst dem vorgenanten lehen mit aller zuegeho^erung umb aecht phunt Wynner phenning, der wir gantz und gar gericht und gewert sein, und daz uns emaln gedi^ent hat zwelif snitphenning an sand Margretentag und nicht mer. Di vorgenanten zwelif snitphenning, di unser vorgenant oblayhaws emaln gedi^ent hat, haben wir gelegt auf di hofstat, di zwischen dem vorgenanten lehen und zwischen dem haws leit, daz weiln Petreins von Fu^ert gewesen ist und auch in daz vorgenant lehen emaln geho^ert hat, di mon uns und unserm gotzhaws alle jar dinen schol di vorgenanten zwelif phenning von der vorgenanten hofstat an sand Margretentag. Iz schol auch di vorgenant hofstat, di uns di zwelif phenning dinen schol, allez daz leyden als ein anderr, der unser und unsers gotzhaus behauster hold ist. Si mugen auch mit der vorgenanten lehenstat und mit dem vorgenanten lehen zu dem dinst und zu allem dem rechten, als vor geschriben stet, und daz lehen von alter gehabt hat, allen irn frumen schaffen mit versetzen mit verchauffen schaffen machen und wol geben, swem si wellent, aber nur alain ainem, der dem gotzhaus zu einem holden fuegt, als pu^erchrechts recht ist und des landes recht in O^esterreich. Swann aber daz lehen verchauft wirt, daz do gelegt ist auf daz vorgenant oblayhaws, so schol mon uns und unserm gotzhaus zwelif phenning ze ablait geben und zu anlait alsvil und nicht mer. Ez schullen auch di holden, di emaln in daz vorgenant lehen gestift sint, virtzik phenning pu^erchrechts dinen und di zwo hofstet doran igleichew zehen phenning pu^erchrecht raichen an sand Mychelstag in di vorgenante lehenstat, di genant ist daz oblayhaws under dem perig unverzogenleich, als pu^ergrecht ist. Si schullen aber mit stewr und mit allem umbgelt mit stiften und mit sto^eren ainem abpt wartunt sein als ander sein holden und diselbig anlait und ablait schol dem gevallen, der daz lehen von herren hant hat. Und doruber zu einer ewigen bestaetigung geben wir in den offen brief versigilten mit unsern paiden anhangunden insigiln. Der brief ist geben nach Christi gepu^erd uber drewtzehen hundert jar dornach in dem fumf und sibentzkistem jar an sand Mertentag.

Source Fulltext: FUCHS, Göttweig I (=FRA II/51, Wien 1901) S. 630-631