Wir graf Herman von Cili, Hainreich von Rauhenstain und Heug von Dybein veriehen und tun chunt offenlich mit dem brif umb di sto^ezz und missehellung, so wi^er drey von unsers freundes Hertneids von Pettaw seligen kinder wegen gen einander gehabt haben, daz wi^er darumbe nach rat unser frewnde gênczlich und frewntlich u^eberain worden sein also, daz wi^er vorgenante drey diselben kinder mit einander innehaben su^ellen und su^ellen si ouch mit aller ir^er habe und i^eren vesten trewlich besorgen und si mit purkgrafen und amptleuten zu beseczen zu der kind handen und frumen und su^ellen ouch all purkchgrafen und amptleut globen und sweren zu der kinder banden. Wêr aber, daz wi^er ainen oder mênigeren purkgrafen vercheren wolden oder si sich selben, so su^ellen wir drey dann mit einand ander purkgrafen seczen, die da sweren den kindern zu Iren banden und frumen gewêrtig ze sein zu geleih er weis als di ändern. Wer ouch, daz wi^er obgenante drey umb die purkgrafen ze seczen sto^ezzig wurden, weih zwen u^ender uns drein dann darumb u^eberain und anhelig sind, nach derselben zwayer willen su^ellen dann die purkgrafen und amptleut geseczt werden. Auch su^ellnn wi^er dreÿ all jar in der vasten von allen purkgrafen und amptleuten raytung verhören oder aber die unsern, den wi^er trawen, darzu schaffen, die alle raytung von den amptleuten den kindern ze frumen treulich verho^eren und oufnemen. Dann umb die verlehenten guter, wie die genant sind, die von den obigen kindern ze lehen sind, ob yemant dieweil mit denselben lehen icht handien wi^ert mit versoczen mit verchauffen oder mit vermachen oder mit wen daz wer, daz sol alles geschehen vor unser oder sunderlich vor dem u^ender u^ens drein, den man darumb allernagst beraychen mag, und vor welhem u^ender uns dreyn dann dieselben lehen gehandelt werden, der sol ez beschreiben und darnach an der nächsten raytung fu^ertragen und den ändern ze erchennen geben. Wer aber, daz die weil den kinden icht ledig wurden lehen mit dem tod oder mit wen daz wer, ist, daz es weltlich lehen sind, der su^ellen sich die amptleut zu der kinder banden underwinden und die getrewlich innehaben alz andrew gůter. Sind ez dann ki^erchlehen, darumb sullen wi^er drey gênczlich u^eberain werden piderleuten die ze verleihen oder ob wi^er all drey sto^ezzig darumb wurden, weih zwen under u^ens dann darumb uberain sind, die sullen die goczgaben leihen piderleuten leutlich durch got. Wer ouch, daz dieweil die kinder irer leut oder ir amptleut icht angreng, dez die amptleut nicht ausgerichten mo^echten daz su^ellen wir dreÿ, zwen oder ainer, an den ez die amptleut alweg pringent, gênczlich und treulich ausrichten an alles geverd ouf unser selbes gelt an der kind schaden. Wer auch, daz die weil die kinder mit dem tod abgiengen, êe daz si zu iren jaren cho^emen, da got vor sei, so sullen all purkgrafen und amptleut die vesten und guter trêulich und angevêrd innehaben u^encz alz lang, daz darumb mit den rechten erfunden wirt, wem oder wahin dann iglichs durch recht gevallen sol, und daz sol ouch in eins iglichen purkgrafen und amptmans ayd, wenn er swêrt, sunderlich und aigentchlich begriffen werden. Und daz daz also stet und unzebrochen beleib, dez geben wi^er all obgenante drei ze urchund disen bri^ef mit unser aigner anhangunder insigel und zu pessrer sicherhait mit unser lieben frewnd Hannsen von Liechtenstain zu den zeiten unsers gnedigen herren herczog Albrecht von Osterreich etc. hofmeister und Hainreichs von Walsse ouch aigen anhangunden insigeln besigelten, die si durch unser fleizzigen pet willen zu geczeugnu^esse daran gehengt habent in und iren erben an schaden. Der geben ist ze Rakespurg nach Christi gepurd dreuczehen hundert jar darnach in dem fu^emf und achczigistem jare an mittichen in den quatembern in der vasten.

Source Fulltext: FUCHS, Göttweig I (=FRA II/51, Wien 1901) S. 684-686