Ich Ott der Halbeger von Nidem Welnikch vergich offenlich und tu^en chu^end allen lewten, die den brief sechent und horent lesen, das ehernen sind Chonrat der Hu^eber von Etterding, Perchtold von Steczendorff, Nicla der Haniff von Fuching, Michel der Chuffinger von Mu^emaw^e, Niclas der Schu^ester von Zekking, Mathes von Rotoltstorf und Symon der Pehaim fur Micheln von Lenterstorff, di zeit richter dacz Nidem Welnikch, do er gesezzen ist doselbes in offner schrann an dem rechten, und rügt der erstgenant Chonrat der Huber von Etterding an sein selbs stat und an aller der lewt stat, di oben nach im geschriben sind, und an aller i^erer miterben stat hincz ainem ganczen weinczu^erlgericht gelegen zu^e Nidem Welnikch pei dem nidern tar zenachst dem nidern mairhof und hincz ainem halben weinczurlgericht gelegen ob Niclas haws von Flednicz¹ auch ze Nidern Welnikch und hincz ainem halben mai^erhof gelegen in demselben do^erf zenachst dem a^empthof, das sew derselben gueter mit aller i^er zu^egehoru^eng nachst und pest erben, wem nach der erbern vraw^en tod Elspeten, di zeit Michels hausfraw^e von Lenterstorf, dovon das dieselben gueter von Stephan seligem dem Wevmlein i^erm vodern wi^ert herchomen wern, des nächst und pest frewnt sew wern. Do sprach der obgenant Michel von Lenterstorf, die vorgenanten gueter das gancz weinczurlgericht und das halb weinczurlgericht und der mairhof halber wern sein und seiner obgenanten hausfrawn Elspeten und i^er paider erben rechts erchauffts guet umb i^er ledigs wolgewunen hab und dann der ander tail, do man nicht hingeru^egt hiet, der wer auch seiner egenanten hau^esfrawn Elspeten ledigs guet und wer auch gechaufft warden umb i^er selbes varu^end hab und umb i^er vaterlich haimstew^er und wolt der rugu^eng nicht dulden hincz den obgenanten guetern und pat fragen, was recht wer. Do geviel dem obgenanten Micheln von Lenterstorf mit frag und mit urtail und auch seiner hau^esfrawn Elspeten, er scholt ainen richter seczen an sein selbs stat und scholt dem obgenanten ruger Chonraten dem Hu^eber fu^erpieten mit vronpoten und ze wizzen tu^en, er und sein hau^esfraw Elspet wolten der rugung nicht lenger dulden hincz den obgenanten guetern. Hieten sew dagegen icht ze sprechen, das scholten si tu^en mit dem rechten, so wolt er in ainen richter seczen zu^e drin vi^erczehen têgen, als frag und urtail gesagt hiet, und was si da^enn alda erlangten mit dem rechten, da^es wolt er und sein hausfraw Elspet den vorgenanten lewten und allen i^eren miterben wol gu^ennen also, was im und seiner egenanten hausfraw Elspeten und i^er paider erben mit dem rechten geviel, das man sew auch dapei weleiben liezz. Also saczt mich vorgenanten Otten den Halbeger der obgenant Michel von Lenterstorf an sein selbs stat an das recht zu ainem richter. Also vergiengen sich die drei rechtta^eg nach einander albeg ainer über vi^erczechen tag, als frag und urtail gesagt het. Und was auch albeg der obgenant Michel von Lenterstorf und sein hau^esfraw Elspet di drei rechtteg mit vorsprechen vor mein der Zuspruch und anspruch wartund von dem obgenanten lewten und di chomen nicht fur recht in den drin rechttêgen und chom auch nieman von i^ern wegen, der sew ehafter not beredt hiet. Do vragt des obgenanten Michels vorsprech, seind er di drei rechttêg mit seiner wirtin der anspruch wartu^end wer gewesen, als er ze recht scholt und niemant chomen wer, was nu^e recht wer. Do geviel mit vrag und urtail, es scholt vronpot verhört werden, ob er das fu^erpot ze rechter zeit gesagt hiet, als er ze recht scholt. Do sagt vronpot in offner schrann p ei seinen trew^en, als ein vronpot ze recht sagen schol, das er das furbot ze rechter zeit und weil gesagt hiet an die stet, do es hin ze sagen geho^ert. Do pat aber des obgenanten Michels vorsprech vragen, was nu^e recht wer. Do geviel mit vrag und mit urtail von dem erbern gedinge, es scholt Michel von Lenterstorf, sein hausfraw Elspet und all i^er paider erben fu^erbas y^emmer mit den obgenanten guetern und mit aller ir zugehorung beruebt und ledig sein der anspruch von den obgenanten lewten und von allen ir^en miterben, di von Stephans des Wevmleins wegen darzu erben sein wolten. Wer aber, das yeman daruber fu^ercho^em und fu^erbas mer darauf ru^egen oder chlagen wolt mit priefen oder an prief, dieselbig rugu^eng oder ansprach scholt fu^erbaz chain chrafft nicht haben hincz dem obgenanten Micheln und hincz seiner hau^esfrawn und hincz ir paider erben und hincz allen den, die die obgenanten gueter nach in besiczend und innehabent. Darumb schölten sew mi^er meine recht geben. Das habent si getan und des ward also verfolget vor mein von dem erbern gedinge, di des tags in der schrann sazzen. Und des zu urchund gib ich in den offen gerichtprief versigelten mit der erbern hern Hainreichs des Liebenberger und Starichants des Watenstainer und Lebeins, di zeit richter dacz Sand Polten, aller drei^er anhangunden insigeln, wann ich obgenanter Ott der Halbeger di zeit nicht aigen insigel gehabt, und darunder ich mich verpint mit meinen trewn, das sich das recht vor mein also vergangen hat und hab sew gepeten, das sew i^er insigel an meiner stat an den prief zu zeugen gehangen habent in und allen ir^en erben und auch mir an schaden. Der prief ist geben nach Christi gepu^erd drewczehenhundert jar darnach in dem fumf und achczkisten jar des erichtags nach gots leichnamstag.

Source Fulltext: FUCHS, Göttweig I (=FRA II/51, Wien 1901) S. 689-692