Ich Lewppolt der Metsakch und ich Vlreich der Ekkprecht, die zeit des rates der stat ze Wienn, vergehen offenleich mit dem bri^ef, das für den rat der egenanten stat ze Wienn chom Fridreich, die zeit wi^ert in der Cho^etweiger hof, gelegen in der Weichenpurkch ze Wienn und sto^ezzet an Wilhalms haws des Gu^erttler und chlagt, das derselb Wilhalm an der mawr, die zwischen denselben zwayn hew^esern gieng, ein privet auz einer chemnaten hiet. Nu hiet er u^eber dasselb privet an dieselb mawr ho^echer einen stu^el gericht, davon der ungesmach und der gestankch gieng und smekchyet in stuben und ander gemêch, alsweit daz vorgenant haws genant der Cho^etweygerhof wer, und hiet auch der unflat ettwevil durich dieselb mawr gedrungen, daz von alter nicht also hercho^emen wer, und pat darnach den ganczen rat mit gu^etleichem willen unbetwungenleich, das si im geben zwen auz in des rates darauf zu beschawern und darnach im ein recht ze sprechen, dabey er fu^erbaz vor allen chrieg beleiben wolt. Des gab der rat uns obgenanten zwen aus in ym darauf zu beschawern und haben auch wi^er daz privet und die egenanten zway haw^eser aigenleichen und wol beschawt und uns mit gu^eter kuntschaft und gewizzen ervarn und darnach ein recht gesprochen, dabey er fu^erbaz vor allem chrieg beleiben sol also, das der vorgenant Wilhalm den obern stuel des egenanten privets genczleich firdersprechen sol an alles verczi^echen und sol fu^erbaz dhainen ändern stuel nicht mer da machen, denn das der u^enderstuel also beleiben sol, als von alter hercho^emen ist, und sol auch bewarn, das der unflat icht mer durich die vorgenanten mawr gedringen mu^eg angever. Und darnach chomen wi^er wider fu^er den egenanten rat und sagten, da unser kuntschaft in dem rechten, so vorgeschriben stet. Und daru^eber zu einem warn u^erchu^ende geben wi^er von geschefft und gehaizze des egenanten rates dem egenanten haws genant in der Cho^etweiger hof und allen den, die es ynnehabent und besiczent den brief versigelten mit unser bayder anhanngunden insigelln. Der bri^ef ist geben ze Wienn nach Kristes gepu^ert drewczehenhundert jar darnach in dem siben und achczigistem jar des nächsten phincztags vor sand Bertelmestage.

Source Fulltext: FUCHS, Göttweig I (=FRA II/51, Wien 1901) S. 710-711