| Bonifatius episcopus, servus servorum dei, | dilectis filiis Iohanni abbati et conventui monasterii sancte Marie in Gottwico ordinis sancti Benedicti Pataviensis diocesis salutem et apostolicam benedictionem. Ex iniuncto etc. Dudum siquidem pro parte vestra felicis recordationis Vrbano papa^a sexto predecessori nostro exposito, quod prefatum vestrum monasterium, in quo triginta duo monachi et plures continue domino famulabantur et cui quoddam aliud monasterium monialium eiusdem ordinis, in quo viginti quatuor moniales existebant, ac quoddam hospitale pauperum, in quo tredecim pauperes sustentabant,^b erant annexa et subiecta, quibus quidem monialibus et pauperibus vos de fructibus dicti vestri monasterii tenebamini quottidie in omnibus ministrare, tam propter copiosam hominum multitudinem ad ipsum monasterium confluentium, quam propter bladi et vini ac aliorum fructuum penuriam, que pluribus annis in illis partibus viguebant,^c necnon propter maximam hospitalitatem. quam vos servaveratis et continue servare oportebat, ac alia diversa et gravia onera vobis de die in diem incumbentia adeo erat debitorum oneribus pregravatum fructusque redditus et proventus dicti vestri monasterii in tantum exiles et tenues erant effecti, quod vos huiusmodi hospitalitatem servare et onera vobis incumbencia supportare et debita persolvere nequiveratis ullo modo et quod, nisi per apostolice sedis providenciam vobis succurreretur, monasterium ipsum multum desolari verisimiliter formidabatur et pro parte vestra eidem predecessori supplicato, ut in Nelib et * Hofsteten ac in Mautarnn dicte diocesis parrochiales ecclesias, quarum patroni ut asseruistis existebatis, dicto vestro monasterio incorporaret annecteret et uniret, idem predecessor dilecto filio officiali Pataviensi eius proprio nomine non expresso suis dedit litteris in mandatis, ut prefatas ecclesias, quarum centum cum omnibus iuribus et pertinenciis suis prefato monasterio, cuius ducentarum marcharum argenti puri fructus redditus et proventus secundum conmunem extimatione^d valorem annuum ut asserebatis non excedebant, auctoritate apostolica perpetuo incorporaret uniret et annecteret ita, quod cedentibus vel decedentibus rectoribus dictarum ecclesiarum, qui tunc erant, vel ecclesias ipsas alias quomodolibet dimittentibus liceret vobis corporalem possessionem ecclesiarum ac iurium et pertinenciarum predictorum libere apprehendere et licite retinere diocesani loci vel cuiuscumque alterius super hoc licencia minime requisita, reservatis tamen de fructibus redditibus et proventibus singularum * ecclesiarum pro singulis perpetuis vicariis secularibus ibidem instituendis et servituris domino inibi laudabiliter in divinis congruis porcionibus, de quibus vicarii ipsi possent congrue sustentari, episcopalia iura solvere et alia eis incumbencia onera supportare, ac decrevit irritum et inane, si secus super hiis a quoquam quavis auctoritate scienter vel ignoranter contingeret attemptari. Dilectus filius Schawr, licenciatus in decretis, Ratisponensis et Pataviensis ecclesiarum canonicus, officialis Pataviensis, in huiusmodi^e execucionis negocio procedens, prout ex ipsarum forma poterat litterarum, quia omnia et singula in eisdem litteris expressata, super quibus inquisitionem fecit diligentem, reperit forte vera, prefatas parrochiales ecclesias cum omnibus iuribus et pertinenciis suis eidem vestro monasterio auctoritate predicta secundum modum et formam in dictis litteris explicatos perpetuo incorporavit univit et annexuit ita, quod cedentibus vel decedentibus rectoribus dictarum ecclesiarum, qui tunc erant, vel ecclesias ipsas alias quomodolibet dimittentibus liceret vobis corporalem possessionem ecclesiarum predictarum libere apprehendere et licite retinere diocesani loci vel cuiuscumque alterius super hoc licencia minime requisita, reservatis tamen de fructibus redditibus et proventibus singularum ecclesiarum ipsarum pro singulis perpetuis vicariis ibidem per diocesanuin loci videlicet episcopum Pataviensem, qui esset pro tempore, vel sede episcopali Pataviensi vacante per capitulum Pataviense instituendis et servituris domino laudabiliter in divinis congruis porcionibus, de quibus vicarii ipsi possent congrue sustentari, episcopalia iura solvere et alia eis incumbentia onera supportare, certo super hoc instrumento publico confecto sigilli officialatus Pataviensis officii appensione munito. Postmodum vero pro parte vestra nobis exposito, quod vos infra limites parrochialis ecclesie sancti Stephani in Mautarn Pataviensis diocesis nonnulla^f decimas et alia bona ad ipsam ecclesiam et vestrum monasterium spectantia habebatis et possidebatis ac eandem ecclesiam vestro monasterio ut prefertur unitam per vicarium presbyterum secularem regebatis, propter quod in bonis et decimis huiusmodi, ex quibus vos sustentabimini et vivebatis, multipliciter perturbamini et ut commodius huiusmodi bonis et decimis uti possetis, pro parte vestra nobis supplicato, ut vobis et dicto monasterio vestro providere super hoc de benignitate apostolica dignaremur, nos ut cedente vel decedente seculari vicario presbytero huiusmodi dicte ecclesie, qui tunc erat, vel eam quomodolibet dimittente liceret vobis unum presbyterum ydoneum dicti vestri ordinis in vestrum perpetuum vicarium loco eiusdem vicarii secularis ponere, qui eandem ecclesiam regeret ac inibi laudabiliter deserviret in divinis, diocesani loci vel cuiuslibet alterius super hoc licencia minime requisita, reservata tamen de fructibus redditibus et proventibus dicte ecclesie pro eodem vicario per vos in eadem ut prefertur instituendo congrua porcione, de qua idem vicarius possit congrue sustentari, episcopalia iura solvere et alia incumbencia onera supportare vobis auctoritate predicta per nostras litteras indulsimus, prout in eisdem litteris et instrumentis, quorum tenores presentibus haberi volumus, ex certa sciencia pro sufficienter expressis plenius continetur. Quare pro parte vestra nobis fuit humiliter supplicatum, ut predictis litteris et instrumentis et contentis in eis apostolici muniminis robur adicere de benignitate apostolica dignaremur, nos igitur huiusmodi supplicationibus inclinati prefatas litteras et instrumenta ac contenta in eis et quecumque inde secuta rata habentes et grata ea auctoritate predicta ex certa sciencia confirmamus et presentis scripti patrocinio communimus et nichilominus predicta auctoritate motu proprio non ad ipsorum abbatis et conventus vel alicuius pro eis super hoc oblate peticionis instanciam, sed de nostra mera liberalitate predictas parrochiales ecclesias, eciam si super aliqua ex eis lis, cuius statum haberi volumus presentibus pro expresso, pendeat indecisa, de novo incorporamus annectimus et unimus supplentes eciam omnes defectus, si qui forsan intervenerint in premissis constitucionibus et ordinationibus apostolicis et aliis contrariis non obstantibus quibuscumque. Nulli ergo etc. Datum Rome apud Sanctum Petrum II. kalendas aprilis, pontificatus nostri anno duodecimo.

Source Fulltext: FUCHS, Göttweig I (=FRA II/52, Wien 1901) S. 3-6