Wir Albrecht etc. bekennen fur uns und unser erben und tun kunt offentleich mit dem brief, als die zechleut unser lieben frawn kirchen zu der Ramsaw zway gu^eter, ains an dem Obern Hohemperg und ains in dem Nidern Haygraben gelegen, unser lehenschaft von weilent Petern dem Wildegker zu der zech derselben kirchen zu unser frawn gekauft habent, daz wir vo^erdrist durch gots und auch durch unsers lieben getrewn Stephans von Hohemberg fleissigen pet willen und von sundern gnaden unsern willen und gunst darczu gegeben und dieselben gu^eter zu der egemelten zech geaignet haben, dieweil si bey derselben zech beleibent, und aignen die auch von furstleicher macht wissentleich in kraft diczs briefs, was wir zu recht daran aignen sullen oder mugen in solher mass, daz si furbazzer bey der vorgenanten zech beleiben innzehaben, ze nuczen und ze niessen, als aignêr gu^eter und lands recht ist. Wir verczeihen uns auch der manschaft und lehenschaft, die wir darauf haben gehabt ungeverleich mit urkunt des briefs. Geben zu Wienn an freytag nach sant Gregorientag nach Kristi gepu^erd vierczehenhundert jar darnach im drew und dreissigisten jare.

Source Fulltext: FUCHS, Göttweig II (=FRA II/52, Wien 1901) S. 250-251