Nos Mathias dei et apostolice sedis gracia episcopus Vitricensis,¹ reverendissimi in Cristo patris ac domini, domini Leonhardi eadem gracia episcopi Pataviensis in pontificalibus cooperator, universis Kristi fidelibus presentes litteras inspecturis salutem in domino sempiternam. Deum credimus habere propicium etc. Hinc est, quod anno domini millesimo quadringentesimo trigesimo nono in natalicio sanctorum apostolorum Petri et Pauli capellam annexam choro et dormitorio in honore sancte et individue trinitatis ac gloriose virginis Marie necnon sancte et invictoriosissime crucis domini nostri Ihesu Kristi et omnium sanctorum et specialiter in honore sanctorum apostolorum Petri et Pauli, sancti Achacii et sociorum eius cooperante nobis gracia spiritus sancti ad instanciam venerabilis patris ac domini, domini Luce tunc temporis abbatis in modum ecclesie consecravimus cum suo altari principali. Continentur autem hec reliquie in eodem altari: primo de cruce domini, de sepulchro domini, de loco, quo obiit beata virgo Maria, sancti Iohannis baptiste, sanctorum apostolorum Petri et Pauli, apostolorum patronorum, sancti Andree apostoli, sancti Iohannis apostoli et ewangeliste, sancti Bartholomei apostoli, sanctorum Blasii Achacii Albani Alexandri Fortunati martirum, sanctorum Udalrici Martini Wolfgangi Benedicti Heinrici confessorum, sancte Anne, sanctarum Margarethe Barbare Appollonie Erndrudis virginum necnon omnes reliquie, que prius fuerunt in eodem altari contente. Volumus eciam, quod dedicacio eiusdem capelle celebretur futuris temporibus in die sancti Udalrici per transposicionem. Consequenter notandum, quod sub anno ab incarnacione domini millesimo quadringentesimo trigesimo septimo in die sancte trinitatis (1437 Mai 26) consecravimus capellam in ambitu ad peticionem prefati domini abbatis in honore sancte Katherine virginis et martiris ac sancte Anne matris Marie. Continentur autem in eodem altari reliquie infrascripte sanctorum videlicet Mathei Symonis et Iude apostolorum, sanctorum Stephani prothomartiris Eustachii Achacii et sociorum eius Erasmi Sebastiani Georgii Oswaldi Cholomanni martirum, sanctorum Silvestri Udalrici Hŷlarii Erhardi confessorum, sanctarum Katherine Margarethe Ursule virginum et sancte Anne necnon omnes reliquie, que fuerunt in altari penes chorum prius recondite. Item notandum, quod ad peticionem prenominati domini Luce abbatis transtulimus dedicacionem eiusdem capelle sancte Katherine proxima dominica post festum sancte Anne. Eodem eciam anno et die sancte trinitatis reconciliavimus ecclesiam maiorem videlicet monasterium et omnia altaria in eo inclusa et altare sancti Michaelis in alto situatum et altare omnium sanctorum super lectorio, item criptam cum suis altaribus, item capitulum cum suis altaribus et cimiterium monasterii et ambitus, item capellam sancti Benedicti cum suis altaribus, item ecclesiam parrochialem cum suis altaribus una cum cimiterio eidem ecclesie annexo, deinde proxima die sequenti idem festum sancte trinitatis (1437 Mai 27) monasterium sororum cum ambitu et altaribus in eo inclusis, item capellam sancte Erndrudis cum suo altari eidem monasterio virginum contiguam, item capellam sancti Andree apostoli cum altari in domo domini abbatis situatam, item capellam sancti Georii cum suo altari extra muros monasterii positam. Cupientes igitur, ut predicte capelle cum ecclesiis et altaribus prenominatis congruis honoribus frequententur et ut Kristi fideles cultum divinum in eisdem eo frequencius visitent et illue veniant, omnibus vere penitentibus confessis et contritis in festivitatibus infrascriptis videlicet nativitatis Kristi circumcisionis epyphanie et per totam quadragesimam, parasceves pasche ascensionis penthecostes corporis Kristi invencionis et exaltacionis sancte crucis, in omnibus et singulis festivitatibus beate Marie virginis videlicet concepcionis nativitatis presentacionis annuncciacionis visitacionis purificacionis necnon assumpcionis, sancti Michaelis archangeli, nativitatis et decollacionis Iohannis baptiste beatorum apostolorum Petri et Pauli ac omnium aliorum sanctorum apostolorum et ewangelistarum sanctorumque Stephani Laurencii Vincencii Clementis Georgii et Cristofori martirum, sanctorum Martini Nicolai Gregorii Augustini Ambrosii et Ieronimi confessorum, sanctarum Marie Magdalene Katherine Margarethe Barbare Cecilie Lucie Agathe Agnetis et undecim rnilium virginum atque Erndrudis virginum, Elyzabeth Helene Hedwigis viduarum, in die omnium sanctorum et conmemoracione omnium animarum et per octavas dictarum festivitatum octavas habencium singulisque diebus dominicis ac diebus patronorum et patronarum necnon dedicacionibus earundem causa devocionis et oracionis aut peregrinacionis accesserint seu qui missis predicacionibus matutinis vesperis aut aliis quibuscumque divinis officiis ibidem interfuerint aut corpus Kristi vel oleum sacrum, cum infirmis portentur, secuti fuerint seu in serotina pulsacione campane aut in mane secundum modum curie Romane flexis genibus ter: ave Maria, dixerint necnon qui ad fabricas luminaria ornamenta aut quevis alia dicte ecclesie necessaria manus porrexerint adiutrices aut aliquod aliud karitativum subsidium donaverint, quocienscumque premissa vel aliquod premissorum fecerint, de omnipotentis dei misericordia Petri et Pauli apostolorum eius auctoritate confisi suffragiis quadraginta dies de iniunctis eis penitenciis misericorditer in domino presentibus elargimur perpetuis temporibus duraturis, in cuius rei testimonium presentes litteras iussimus sigilli nostri appensione communiri. Datum anno millesimo quadringentesimo trigesimo nono in die sanctorum Petri et Pauli apostolorum.

Source Fulltext: FUCHS, Göttweig II (=FRA II/52, Wien 1901) S. 315-317