Sacrosancta generalis synodus Basiliensis in spiritu sancto legittime congregata universalem ecclesiam representans universis Christi fidelibus presentes litteras inspecturis salutem et omnipotentis dei benedictionem. Licet is etc., nichilominus tamen desiderantes domino populum reddere acceptabilem et bonorum operum sectatorem fideles ipsos ad complacendum sibi quasi quibusdam allectivis muneribus indulgenciis scilicet et remissionibus invitamus, ut exinde reddantur divine gracie apciores. Cupientes igitur, ut capella sancti Blasii de Sancto Blasio, que infra montem Go^ettweig ad monasterium beate Marie virginis in Go^etwico, ordinis sancti Benedicti Pataviensis diocesis, pertinentem ut asseritur situata existit et cuius edificia de novo edificata sunt et pro structura sua sibi non suppetunt facultates, a Christi fidelibus congruis honoribus frequentetur et ut ipsi Christi fideles eo libencius causa devocionis confluant, ad eandem et ad edificacionem huiusmodi manus prompcius porrigant adiutrices, quo ex hoc ibidem dono celestis gracie uberius conspexerint se refectos, de omnipotentis dei misericordia et beatorum Petri et Pauli apostolorum eius ac universalis ecclesie auctoritatibus confisi omnibus vere penitentibus et confessis, qui in festo prefati sancti necnon ipsius capelle dedicacione eandern devote visitaverint annuatim et ad eius edificacionem et construccionem manus porrexerint adiutrices, unum annum et unam quadragenam de iniunctis eis penitenciis perpetuo relaxamus. Datum Basilee VII. idus iulii anno a nativitate domini millesimo quadringentesinio quadragesimo.

Source Fulltext: FUCHS, Göttweig II (=FRA II/52, Wien 1901) S. 332-333