Subiectionem etc. Venerabilis et merito amate pater! Duas hucusque in loco peregrinationis constitutus avolatas suscepi grate vespertiliones, quibus sufficienter pro nunc mihi insinuantur favor et amor in pectore vestrae paternitatis mihi repositi, quos usque in finem peto mihi conservari humiliterque deposco, quatenus crebro me peregrinum talibus nuntiis ipsa vestra paternitas visitare dignetur, quem unus duntaxat apex solet recreare. Nec imputet ipsa vestra paternitas, quod eidem vicissim non respondeo aut similiter, ut fortasse desiderat, tociens rescripsero tum propter ruditatem meam cum praecipue, quia locus extra stratam communem situs opportunes nobis denegat nuntios, etiamsi quid pro tempore nuntiandum occurrerit. De statu vero morali nescio, quid intimarem, cum negotia et status observantiae hic aliter stat, quam nobis fuit suggestum, immo multo aliter, quam ante biennium reliqueram. Importunos quosdam habebimus et haberemus, si quid cum serio egissemus, quod nondum fecimus,^a et reliqua plura usque ad finem. Valeat vestra paternitas in filio de virgine nuper nato, qui et eandem sua gratia crebro visitare et illuminare dignetur, ut post aerumnas saeculi huius nequam bravium felicitatis aeternae attingere valeat. Ex Gotuico in solemnitate sancti Iohannis evangelistae anno 49.

Source Fulltext: FUCHS, Göttweig II (=FRA II/52, Wien 1901) S. 420