Wir Fridreich etc. Casparn Hornperger, official ze Wienn, und Sigmunden von Eberstorf, obristen kamrêr und unserm hubmaister in Osterreich etc. Uns hat der ersam geistleich unser lieber andechtiger . . der abbt zum Kottweig anbringen lassen, wie auf sein kirhen zu Sand Veit auf der Go^elsen, die kirhen zu Mawtarn und die kirhen im Halbach,¹ die im und seinem goczhaws vor lannger zeit sein incorporiert worden, ain merkhlicher anslag von des vergangen velds wegen sey getan worden, des er sich beswêrt bedunkht, nachdem und er sein volkh ze rossen und ze fu^essen, als maist er hat mugen, in demselben veld gehabt hab und auch vormaln, wenn so^elh gemain ansleg auf die priesterschaft und kirhen im lannd sein beschehen, kain anslag darauf sey getan worden, emphelhen wir ew und wellen ernstleich, daz ir in der sach aigentleich ewr ervarnuss habt. Erfindt ir dann, daz vormaln in so^elhen gemainen anslegen auf dieselben kirhen ansleg sein getan worden, daz ir die noch davon nemen lasset. Wêr aber, daz die benanten kirhen vor lannger zeit dem obgenanten goczhaws incorporiert wêren und so^elh ansleg vormals in sunderhait nicht darauf beschehen sein, daz ir dann darob seit und mit den dechanten von unsern wegen schaffet, was si solhs anslags auf die bemelten kirhen getan hieten, daz si den wider abtu^en und davon nicht nemen und den obgenanten von Kottweig sein kloster und die pharrer der egenanten kirhen darumb unbeku^emert und unangelangt lassen etc. Geben zu der Newnstat an montag vor sand Michelstag anno domini etc. quinquagesimo, unsers reichs im aindleften jare.

Source Fulltext: FUCHS, Göttweig II (=FRA II/52, Wien 1901) S. 425-426