Ich Wolfgang Rêtenperger bekenn fur mich und all mein erben und tun kund offenlich mit dem brief, das mir der erwirdig geistlich herr, her Wolfgang abbt unser fraun gotshauss zu Gottweig und der convent gemain daselbs von sundern gnaden und durch meiner dinst willen, so ich in beweist und erczaigt hab und auch hinfu^er erczaigen und beweisen sol, verlassen habend von dem nagstku^enftigen sand Michelstag auf sechs gancze jar nach einander voligund ir^en hof zu Wienn in solher beschaidenhait, das ich in denselben hof und das ambt beÿ Prugk auf der Leitta und daselbs umb, als das dann von alter her in denselben hof ist gevechsent worden, treulich innhaben und nach irs gotshauss nucz und notdurft verwesen und jerlich das treulich und ungevêrlich verraiten sol und wil. Ich sol sew auch, als offt sy in denselben ir^en hof ko^ement, fu^ersehen und in gewertig sein mit petten und pettgewanten mit holcz tischtu^echern und allem anderm hausgeschir nach notdurften. Ob sy^e aber etlich teg stêttigs beliben, so su^ellen sy^e in dem holcz mit mi^er ain genedigs mitleiden haben ungevêrlich. Auch sol und wil ich, so ir diener oder anwêlt auswendig des abbts oder convendts in iren notdurften hergesandt werden, denselben treulichen hilflich sein ir sach von des gotshauss notdurft ausczurichten, so die an mich gelangent, und die mit speis fursehen und fu^er ain junkherrenmal zehen phenig und fu^er ain knechtmal acht phening nemen oder in die raittung schreiben, als das dann von alter ist herko^emen. Aber wann sy mir etlich r^es gotshauss notdurft ausczerichten mu^endlich oder in geschrift emphelhen wurden, als oft das geschiecht, so sol ich mich, ob ich dieczeit mit andern notdurften nicht beladen bin, ungevêrlich nach mein vermu^egen darinn treulich mu^een und die ausczerichten willigen beweisen auf ir ko^est und zerung. Daentgegen su^ellen sy mir jêrlich geben und gevallen lassen ain mutt korn, ain mutt habern und ain phund phenning, so ich perso^endlich die verlassung der zehent mit andern ir^en dienern bereite, und als offt mein herr der abbt in sein und des gotshauss notdurft in den egenanten hof herko^ement, so su^ellen ich und mein hausgesind von seiner kuchen und keller gespeist werden fu^er die mu^ee. so wir mit im und den sein haben mu^essen. Und wann sy^e mich zu ausgang der bestandjar und fu^erbaser andere jar bey dem bestand des egenanten irs hofs in vorgemelter maÿnung und rechten nicht lengêr behalten wellen, das sullen sŷ mich albeg ain gancz jar vorhin wissen lassen, dann so sol ich mich nach ausgang desselben jars aus irm hof ziehen und in des bestands abtretten an alle irrung und dieweil mir aber der bestand ir^es hofs vorhin also nicht aufgesagt wirdet, so sol ich mich desselben bestands in vorgeschribnêr maÿnung und rechten gênczlich halden. Wêr aber, das ich beÿ dem bestand irs hofs nach ausgang der egenanten sechs jar und fu^erbaser andere jar nicht lengêr beleiben wolt, das sol ich in auch vorhin albeg ain gancz jar zu wissen tun, des ich mir gewalt vorbehalten hab. Und dann so sol und mag ich mich nach ausgang desselben jars des bestands abtun und davon gancz ledig sein an alle hindernu^ess ungevêrlich. Des zu urkund gib ich in den brief in egemelter maÿnung besiglten mit meim anhangundem insigl. Des ist geczeug durch meiner vleissigen pet willen der erber Hanns Rauenspurger, urtailschreiber und burgêr zu Wienn, mit seim anhangundem insigl im und sein erben an schaden. Geben zu Wienn an sambstag nach sand Mathiastag apostoli nach Cristi gepurd virczehenhundert und in dem ains und fu^enfczigisten jare.

Source Fulltext: FUCHS, Göttweig II (=FRA II/52, Wien 1901) S. 426-428