Hochwirdiger etc.! Ich las ewr gnad wissen, das an heutigem tag des freitags zwischen des kaisers auch seines brueders und der lanndlêut ain frid¹ gesaczt ist vor mittag von siben uncz auf zwelffe. Zu daiding mit dem kaiser ist von dem herczogen und den lanndtleutten im fu^ergehalten, das sein gnad der reigierung des lanndts abtret auf zwai iar und was dan die vier partey, die nun ganncz verbriefft und versigelt ist und zu der stat handen geantwurt, zwischen dem kaiser und seines brueders von der prela^etten stetten merchkten geslo^essern, so der herczog yczo pey seinen hantten in den kriegen mit zuesagen und mit werhaffter hannd gewunen und in sein gwalt pracht hat, des well der herzog gern pein den vier partey beleiben, dadurch das lannd wider gannzes zu einander gepracht werde ausgenomen des lanndes ob der Enns, als es von alter gwesen ist, des aber der kaiser kains nit tuen wil. Darauf ain anttwurt durch die kaisserin, herczog Albrecht mo^eg wol oder u^ebel an seinem brueder tuen, er wiss wol, wes er sich verschriben hab. Des secz sy zu seinen fu^erstlichen wierden und eren auch den von Wienn ain anttwurt, sy haben ir henndt an irrn herren und gema^echel, auch an irm sun auch an ir geneczt und mu^eessen ir henndt in irem unschuldigen pluet waschen, ee wan sy sich in der purkch begeben und darumb ir leben aufgeben wellen. Nun verste ich icht annders nach dew, und is an heutigem tag verlassen ist, man werd in mit gwalt fu^ernemen und die purchk gewinen und mit allew zeug und lewtten gancz darzue gericht. Vil mer sind verhannden, die ich ewrn gnaden yecz nicht geschreiben mag. Gnêdiger her, der kunig von Pehaim, sein sun der von Sternberchk habent der stat Wien abgesagt. Mein her der herczog hat den Eyzinger, herren Niklassen den Trugsa^eczen, den Frawnhoffer zu dem kunig gesannt, das villeicht die absag understanden wirt. Gnêdiger her, wir sein in der stat in den ha^ewsern noch auf der gassen vor des kaisers pu^echssen schussen und wu^erfen aus der purchk nimmer sicher weder bey tag noch nacht nicht. Davon rat ich ewren gnaden yecz nicht her, uncz die sach umb die purchk geaint wirt, wen die kaiserin den von Hochenburgk vast verdeucht, das er in den sachen ain da^eidinger ist, darumb das er ain briester ist, wen die sach beru^eer leib und leben. Geben zu Wienn am freitag in der nacht vor Lienardi anno domini etc. im LXII. jare. Wolfganng Hasler, ewr dienner etc.

Source Fulltext: FUCHS, Göttweig II (=FRA II/52, Wien 1901) S. 539-540