Wir Fridreich etc. dem abbt und convent zum Go^etweig etc. Wir lassen ew wissen, daz wir uns durch frid und gemachs willen unser, ewr und lannd und lêwt mit unserm getrewn Jo^ergen Marschalh von Stuntzperg umb sein spru^ech und vordrung, so er von weilent unsers bru^eders hertzog Albrechts wegen zu uns gehabt hat, verainet und im umb ain summ gelts die kirchen und ungelt zu Wilhalmspurg in satzweis ingeben und verschriben haben laut unser brief darumb ausganngen, uber dieselb summ gelts wir im yetz sechshundert Ungerische und ducaten guldein dartzu^e auch ausrichten und geben su^ellen. Und wan wir aber derselben summ guldein von merklicher ansu^ehung der grossen geltschuld wegen, so der benant unser bru^eder hertzog Albrecht hinder sein gelassen hat, so pald mit fu^eg nicht vermu^egen zu bezalen, begern wir an ew mit ganntzem fleiss, emphelhen ew auch ernstlich, daz ir uns zu betzalung derselben sechs hundert guldein, hundert derselben Ungerische und ducaten guldein darleihet und die furderlich auf ewr und ewrs gotzhaws leut daselbs umb Wilhalmspurg gesessen slahet, inbringet und dem obgenanten Marschalh an vertziehen ausrichtet gebet und antwurttet zu seinen handen und daentgegen sein quittung nemet, so wellen wir ew der wideru^emb gnêdiklich entrichten, und uns des nicht vertzeihet, als wir dann des sunder vertrawn zu ew haben, damit wir, ir selbs und lannd und leut schadens und unrats, so daraus wachsen mo^echt, vertragen beleiben, etc. Geben zu der Newnstat an freitag sannd Florianstag anno domini etc. LXIIII, unsers kaysertumbs im dreytzehenten jare.

Source Fulltext: FUCHS, Göttweig II (=FRA II/52, Wien 1901) S. 594-595