Fridreich etc. Ersamen geistlichen lieben anda^echtigen! Als auf dem nagst gehalden lanndtag zu Kornewnburg ain gemaine lanndtsteur in unserm fu^erstentumb O^esterreich underhalb der Enns, ye von zwainczig pfunt pfenning werdt ains ze nemen fu^ergenomen, die anzeslahen und ew bevolhen ist, dem edeln unserm lieben getrewen Jorigen von Volkchensdorff unserm rat zu unsern handen zu antwurtten nach laut unser brief darumb ausgangen und wan wir aber am nagsten mit dem edelen unserm lieben getrewn Zdennkorn von Sternberg der aufordrung halben, so er zu uns geseczt hat, in ain vertrag¹ gangen sein und wir im die auf die weinnachten schirstku^enftigen, damit land und lew^et dester pas in frid und rue peleib, ain merchkliche sumb gelcz zu bezallen benent und dem obgenantten von Volkchelsdorff bevolhen haben im die von der beruerten stewr zu wezallen, empfelchen wir ew ernstlich und wellen, das ir demselben von Volkchelsdorff an der obemelten landtstewr fu^ederleich und an verziechen tausent Vngerische und ducaten gulden ausrichtet und gebet, damit er die zu des benanten von Sternberg bezallung geprauchen mu^eg und im damit nicht verziehet, nach darin nicht anders tuet. Wan ob wir deshalben sa^ewmig sein und wir des gein demselben von Sternnberg schaden nemen wurden, desselben schadens wolten wir von euch beko^emen. Wir wellen euch auch die bemelten tausent gulden zusambt den tausent gulden, so ew zu des Smikosky bezallung angeslagen sein, an der beru^eertten lanndsteur schaffen zu legen und abzuziehen. Davon etc. Geben zu der Newnstat am suntag vor sannd Elspetentag anno domini etc. im LXIIII, unsers kaisertumbs im dreuzehenden jare etc.

Source Fulltext: FUCHS, Göttweig II (=FRA II/52, Wien 1901) S. 625