Ich Wo^elfgang und ich Hanns gepru^eder die Mulbanger zw Rew^etharting bêkenn und tu^en ku^end o^effennleich mit dem brief fu^er uns und all unser eribn und fur unserew geswistredt, wie die mit namen genant sein, dafur wir uns wissentleich in krafft des briefs angenomen haben, als von wegen der zu^eespru^ech und anvo^edrung, so die edeln unser lieb vettern Wo^elfhart und Ca^espar geprueder die Mu^elbannger zw uns geseczt haben; darumb sy mich obgenanten Wo^elfgang Mu^elbanger mit ladung furgenomen hetten: von erst des spruchs wegn, so zwischn unsers vater Veichten Mulbanger sa^eligen und der obgemelten unser vêttern vormallen ausgegangen ist, darzue sêw vermainten, das wir invallig wern, auch von des gu^eets wegn am Aichperg soll albeg der ellto^er Mulbanger vogten und von des guets wegen im Erlach, das zu ainer stifft geho^ert, da soll ez bey beleibn, auch von wegn der gueter zu Perckhaim in Widemspekcher pfarr gelegn, daru^emb sew uns auch angelangt habn. Auch het mich obgenanten Wolfgang Mulbanger mein vetter Wolfhart Mulbanger mit ladung furgenomen auf ain gelltbrief, so er von mir gehabt hat. Auch von ains geltbriefs wegn, so ich an mich erlost het, auf mein vettern Wolfharten Mulbanger lautu^end gegen dem Kersperger, auch von aller ander spruch und anvodrung, so wir zu in und irn eribn und sew herwider zw uns und unsern geswistreten und eribn vermainten zu haben, wie sich die zwischn unser bis auf hewtign tag dato des briefs verlawffen und gehallten ha^eben, sein wir zu paider seit hindergegangen und geflo^ehen hinder dew wo^elgeporn Herrn, herrn Rueprechten und herrn Mertten gevêttern von Polhaim und hinder den edeln und vesten ritter, herrn Kristo^effen Hohenfelder, pfleger zu Franckenburgk, und den edeln Gorign Hiersfelder, was die daraus machen, gelobn wir mit unsern trewn ern und pey den va^ellen hernach geschribn wa^er und sta^et zu hallten und das iecz und hinfur in nichte widersprechn in chainerlai weis getrewleich und ungevêrleich. Item von erst haben sew gespro^echn, das der obgmelt spru^ech zwischn unsers vater Veichten Mulbanger und unser obgemeltn vêttern vormallen ausgangen bey krêfften beleiben soll und die gu^eeter zu Perckhaim in Widemspekcher pfarr gelegen, die sullen bey uns und unsern geswistreten und eribn an ir aller irer eribn irrung beleiben und mugen dan furan allen unsern nucz und frw^emen wol damit handeln durich verseczen oder verkawffen, wie uns dez verlust als mit ander unserm aigenhafftn und zuegesprochen guet an ir und aller irer eriben und menigkleichs von irn wêgen einsprechen und hindernu^ess a^engever und der obgemelt geltbrief von mir Wolfgangen Mulbanger ausgennd mitsambt dem schaden ist tod und abgeprochn. Au^ech habent sêw gesprochen den geltbrief vom Kersperger herru^eerend, so ich Wolfgang Mulbanger mit ainer ubergab in mein gewalt bracht hêtt; vernicht tod und ab. Item sy habent auch gesprochen unsern vorgenanten vettern Wolfharten und Ca^esparn und irn eriben umb solh ir zuespru^ech und so obn vernomen ist, von uns, unsern geswistreten und eribn die zwen weingarten in der Wochaw zu der Weissenkirichn genant paid die Wielantin mit irer rechtleichen zuegeho^erung, als die unser vater saliger wir und unserew geswistret inngehabt und genossen haben, darzue sullen wir in alle briefleiche urku^end und gerechtikait, so wir darumb und daran gehabt habn, und sullen in die auch vertig und machen richtig mit purckherren hannde und stat sew und ir eribn mu^egen hinfur damit hanndln und farn als mit ander irm aigenhafft und zu^eegesprochn guet an unser aller unser geswistret und eriben irrung und hindernus. Sy habent uns und unsern geswistreten den Mulbangern zu New^etharting zuegesprochen und ingeanttburt all brief und sigel, so unser vettern auf die obberuerten spruch und ladung gegen uns geprawcht, geno^essen und horn haben lassen. Auch ist namleich gespro^echen wo^erden, was uns iecz brief gebn und geantburt sein worden und die unser vorgemelt vettern Wo^elfhart und Caspa^er gegen uns und unsern geswistreten auf die spruch und ladu^eng genuczt und geprawcht habn und uns nw^en zuegesprochen sein und ob unsern obgemelten vetern Wolfharten und Casparn den Mu^elbangern der brief fur an not sein wurde, dew sullen wir in leichn und fuedrung damit peweisen und darumb sullen sew und gênuegsamkleich||
versorigen und dew nach irn notturften prawchen doch uns obgenanten Wolfgangen und Hannsen den Mulbangern unsern geswistreten und allen unsern eribn an schaden und so sew die dan genuczt haben, uns dew inner jarsfrist widerumb an mangel an entkeltnus und an scha^eden zu unsern ha^ennden antburten. Sew haben auch gesprochen, was sich unbillen zwischen uns bis auf den hewtigen tag der obberuerten sachen halben verlauffen und vergangen habn, das die hinfur ain tail gein dem andern nicht albern noch geprawchen sullen in dhainerlai weis. Item sêw habent auch gesprochen, welher tail den obgemelten spruch nicht stat hielt und in ainem oder menigern artikel daraus trat und dez erweist wurd, der war zu pen gêvallen dem lanndesfursten vierhundert Ungrisch guldein und dem hawbtmann ob der Enns, wer der zu denselben zeiten ist, auch hundert Ungrisch guldein und darzue dem stathaldunden tail aller seiner zuespruch, dannoch sol der gegenburtig^e spruch an im selbs und bey krêfften beleiben. Und des zw ainer warn urkund geben wir Wo^elfgang und Ha^enns gepru^eeder die Mulbanger fur uns und unserew geswistredt, dafur wir uns angenomen haben, den vorberuerten unsern vettern Wolfharten und Ca^esparn gepru^eedern den Mu^elbangern den gegenbu^ertigen offen spruchbrief under meins obgenanten Wolfgangen dez Mulbanger aigen anhangundem insigel und zu pesser sicherhait und zew^egnus haben wir obgenant Wo^elfgang und Hanns geprueder die Mulbanger mit vleiss gepeten den wolgeporn herren, herrn Ru^eeprechten von Polhaim, das er sein insigel auch an den brief gehangen hat im und seinen eriben an schaden, wen ich obgenanter Hanns Mulbanger die zeit aigens gegrabens insigel nicht enhett, under das insigel wir uns und mitsambt under meins obgemelten Wolfgang Mulbanger insigl fur uns und unserew geswistredt, dafur wir uns angenomen haben, und all unser eriben mit unsern trewn aidesweis verpinten alles war und stat zu hallten, das der spruchbrief inhellt und klarleichen aufweist. Der spru^echbrief ist gebn an eritag nach mittervasten, als man zallt von Christus gepurde tawsent vierhundert jar und darnach in dem newnundsechczigisten jarren.

Source Fulltext: FUCHS, Göttweig III (=FRA II/55, Wien 1902) S. 8-10