Ich Elisabeth, Mertten Greÿnêr sa^eligen gelassne witib, bekenn offennlich mit dem brieff und tu^en kchu^end allen den, dŷ in sehen ho^eren oder lesen, dŷ nu^en sind oder hernach kunfftig werden, das ich mit grundtherren hannden, des erwirdigen in got vattern und herrn, hern Larentzen abbt unnser lieben fra^eun gottshaus zu Gottbeig [und] wolbedachtem muet, mit willen und rat meiner frêundt zu den zeitten, do ich es wol getu^en mocht, durch gott und aller gelaubigen seel, besunderlich meiner und meines vorbemeldten Mertt Greÿner und unnser baider freuntschafft seelhail willen geordent und geben hab dem ersamen herren Hannsen Goswein, pharrer des wirdigen gottshaus sannd Anndre pharrkirchen zu Hainfeld, und allen seinen nachkomen meinen hamer gelegen ob des Zehent- pa^eur oberhalb des marckhs¹ zu^e Hainfeld mit aller seiner zugeho^erung also, das er und sein nachkomen denselben hamer hinzelassen und zu entsetzen haben, wie in fu^eget ungeverlich, darauf ÿetzundt ist Wilhalm Lanntzenperger hamerschmid, burger zu^e Hainfeld, in solher maÿnu^eng, das ain ÿeder pharrêr, der ÿetzundt ist oder hinfu^eran wirdet, darumben haben und singen soll alle quotember ain vigili mit new^en letzen, ain gesungens seelambt und ain ambt von unnser lieben fraw^en, darumb der obgemeldt hamer dient einem ÿeden pharrer alle quottember sechs schilling phening, das macht ja^erlich drew phundt und ain phundt mir obgenanntten Elspetten Greÿnerin mein lebtta^eg und nach meinem abganng soll daselb phundt einnemen ain ÿeder zechmaister sannd Anndre kirchen zu Haÿnfeld ewigklich und dasselb zesamenlegen und behalden dem hamer, ob der abprun, da gott vor seÿ, oder stewr darauf geslagen wurde, das alsdann solhe pru^enst und stêur davon auszgericht und betzallet werde dadurch der obgenannt gottsdienst nicht abgee. Und sol auch ain ÿeder zechmaÿster davon beleuchten den jarttag alle quottember mit ainem vierdu^eng wachs. Auch ist zu melden, das der obgenant hamer zu gruntdinst ja^erlich dient vierunddreÿssigk phenning dem Zehentpa^eurn oder ainem anndern, der an dem Zehenthof¹ gesessen ist, albegen zu der heÿligen dreÿer ku^enig tag unvertzogenlich. Wer aber, das der obbemeldt pharrer und sein nachkomen zu Haÿfeld den jartag zu ainer ÿeden zeit nicht begienng, als oben begriffen ist, so soll er darumb verfallen sein zu pesseru^eng ain phundt wachs der kirchen zu^e Hainfeld. Und wann in ainer ausz meiner frêuntschafft oder der burger ainer daselbs ermonen, so soll den vorbenanntten hamer der eltist aus der frewntschafft wider einziehen und sich des mit grundthern hannden wider underbinden doch unengollten des jartags, der dannoch in obgeschribner masse davon verreckht und auszgericht soll werden an all irschall ungevêrlich. Und das solhs alles ganncz statt und untzerbrochen beleib, des gib ich obgenanntte Elisabeth Greÿnerin dem vorgemeldten und allen sein nachkomu^enden pharrern der vorbenanten kirchen den brieff besigelten durch meiner vleissigen gebett willen mit des obgenannttn grundtherren, herren Larentzen abbt zu^e Go^ettbeig anhanngunden insigel, darunder ich mich verpindt mit meinen trewn für mich und all mein erben war vesst und stêt ze haben innhalt des brieffs doch im und seiner genaden gottshaus und allen iren nachkomen an schaden und irer gerechtickait unvergriffennlich. Geben nach Chrissti gepu^erd vierzehenhundert und darnach in dem new^enundsechtzigisten jare an sannd Jorgentag des heÿligen marttrêr.

Source Fulltext: FUCHS, Göttweig III (=FRA II/55, Wien 1902) S. 12-14