Venerabili etc. Laurentio abbati monasterii Gottbicensis ordinis sancti Benedicti nostrarum fundacionis et diocesis Vdalricus dei gracia episcopus Pataviensis etc. Venerabilis, devote in Christo sincere dilecte! Ea singularis confidencia, quam de te gerimus, nos impellit, ut ea‚ que nos premunt et doloribus afficiunt, tibi insinuemus. Eapropter tibi notificamus feria quarta proxima preterita (Februar 26) hora meridiei nos invasisse dolorem dentium, qui versus noctem mitigabatur, et eadem nocte supervenit calculus, que egritudo in nobis adeo invaluit, quod nullam requiem habemus. Et profecto ille morbus ita diversis et intolerabilibus doloribus et passionibus nos afficit, quod destituit nos omni appetitu comedendi omnesque vie urinales sunt nobis precluse adeo, quod a prefata feria quarta usque hodie urinare nequivimus. Hec tibi confidenter scribimus tanquam illi, de quo singulariter confidimus, te in domino adhortantes, quatenus unacum fratribus tuis preces fundas ad omnipotentem deum, ut sua divina clemencia graciam et misericordiam pro sanitate nobis restituenda nobis impendat. Ut autem huiusmodi oraciones efficiantur efficaciores desideramus, ut officium de gloriosa virgine Maria et patronis nostre ecclesie facias decantari, ut isti ad omnipotentem deum pro nobis intercedant. Insuper te adhortamur, quatenus cum aliquo vino claro saporoso non nimis substancioso aliqualiter dulci et quod non corrumpatur et ad caput non fumet, nobis huc velis destinare, quoniam tale hic non possumus haberv, in his omnibus taliter agendo, quemadmodum de te plurimum confidimus. Datum in oppido nostro Sancti Ippoliti¹ die prima mensis marcii anno etc. LXXVII.

Source Fulltext: FUCHS, Göttweig III (=FRA II/55, Wien 1902) S. 102-103