Venerabili etc. Laurencio abbati monasterii Gottbicensis ordinis sancti Benedicti nostrarum fundacionis et diocesis Vdalricus dei gratia episcopus Pataviensis etc. Venerabilis devote, in Christo sincere dilecte! Quia ex nonnullis arduis et pregnantibus causis nedum communem statum ecclesiasticum verum eciam prelatos et clerum nostre diocesis concernentibus statuimus te et alios prelatos nostre diocesis infra Anasum ad oppidum nostrum Sancti Ippoliti evocare ad consulendum te et illos super rebus tam maximis et pregnantibus, que nobis hoc tempore imminent. Cum autem consilium tale tam fructuose nequeat captari, nisi simul personaliter conveniamus, eapropter seriose desideramus te in domino requirendi, quatenus ad diem sancte Dorothee (Februar 6) proxime venturum te ad prefatum nostrum oppidum Sancti Ippoliti conferas. Extunc eciam ibi personaliter constituemur consultantes unacum aliis prelatis nostre diocesis, quos ad prefatum terminum evocavimus, super hiis, que vobis proponentur, et certos nos facias, quod pro conservacione privilegiorum et bono statu tocius ecclesiastice libertatis procurando huiusmodi nostre vocacioni cum effectu pareas, quemadmodum ex obediencia, qua nobis et nostre ecclesie teneris, ad hoc es obligatus. In eo devocio tua debitum suum et nostre voluntatis beneplacitum peraget. Datum in Castro nostro Ebelsperg die vicesima quinta mensis iannuarii anno domini etc. LXXVII.

Source Fulltext: FUCHS, Göttweig III (=FRA II/55, Wien 1902) S. 98-99