Wir Michael von gots gnaden des heiligen Ro^emischen reichs burggrave zu Maidburg, grave zu Hardeckh und lanndmarschalh in Osterreich, und annder seiner kaiserlichen gnaden rête und lanndlewt, die von s. k. g. und gemaÿner lanndschafft zu den sachen daselbs geben sein, embietten den erwirdigen ersamen geistlichen edlen strenngen und vessten erberen und weisen allen und ieglichen den von prelêtten herren der ritterschafft und stetten den lanndlewten gemainklich des bestimbten furstentumbs under der Enns unnsern dinst gru^es und gutten willen bevor. Wir verkhunden ew^e hiemit. das uns ÿetz aigentliche khunttschafft cho^emen ist, wie ain merklicher inczug in das lannd unnder und ob der Enns von Behem¹ heraus ze tu^en furgenomen, auch daselbs besetzung ze machen angetragen seÿ, darauf emphelhen wir ew^e von des bemellten unnsers allergenedigisten herren. des Romischen kaiser etc. ernstlichen und bitten von unnser und gemaÿner lanndschafft wegen., das ir all und ewr ÿeder sunderlich mit dienern rossen wa^egen und allem zewg und notturfften, so man in vellde gebraucht, wenn ew s. k. g. oder wer des von s. k. g. bevelch haben, in velld ervordern wirdet, darauf gantz gericht und berait seit, wie ÿetz gemellt ist, in vellde ze ziehen, den bemellten aus Behem und iren helffern widerstannd ze tu^en und in die beru^erten intzug und beswêrung des lannds ze weren, das auch ewr ÿeder in ewren stetten mêrckhten und aigen solh furnemen und antrag offenlich beru^eeffen und bevelh tu^en lasse sich darnach wissen ze richten und den also nachzegeen. Desgleichs wir dem haubtman ob der Enns auch zugeschriben haben den lanndlewten daselbs eilund zu verkhunden in gleicher weise in vellde aufzesein, dadurch s. k. g., ir all und gemaine lanndtschafft solher kriege, merers unrats und schadens enttladen werden, als ir des s. k. g. und ew selbs ze tu^en schuldig seit. Geben zu Wienn an sambstag vor sannd Steffanstag inventionis anno domini etc. septuagesimo nono.

Source Fulltext: FUCHS, Göttweig III (=FRA II/55, Wien 1902) S. 137-138