Wir Fridreich etc. embietten allen und ieglichen unnsern und anndern lewtten umb unser gesloss Walld ynner zwain meil wegs gesessen und wonhafften, den der brief geczaigt oder verkundt wirdet, unser gnad und alles gut. Wir haben unserm getrewen Sigmu^end Teliczer, unserm phleger zu Wald, bevolhen das allt gesloss daselbs zu Wald abzetragen und ew darzu in robat zu geprauchen und zu ervordern, emphelhen wir ew ernstlich und wellen, wann ir von demselben Teliczer darumb angelangt werdet, das ir ew dann mit wa^egen hawen schawfeln und annderm zewg daselbshin gen Wald fu^eget und helffet dasselb allt gesloss abzetragen und ew darinn nichts sawmen noch irren lasset. Welh aber des nicht tu^en und sich des seczen wurden, die haben wir bevolhen darumb ze phenndten. Davon etc. Geben zu Wienn an montag sannd Alexientag anno domini etc. LXXX, unsers kaisertumbs im newn und zwaintzigisten jare.

Source Fulltext: FUCHS, Göttweig III (=FRA II/55, Wien 1902) S. 156