In dem namen des herrn; amen. Von der geburt desselben tausent vierhundert und achczig iar der dreÿzehenden indicion an montag des sibenundzwaintzigisten tags des moneds november der pabstei unsers allerheiligisten in got vaters und herrn, hern Sixten, von gottlicher fursichtikait pabsts des vierden im zehenden jare seiner regierung der erbirdig in got vatter, herr Valentin Pernpeckh dechant und das ganncz capitl des stiffts Passaw alsdann capitlweis versamnet ein capitl machend und bedewtend in unnser offenbaren notarien und der hernachgeschriben zewgen darzu ervordert und gepetten gegenburtickeit, der benannt herr Valentin techant fur sich und das erwirdig capitl des benannten stiffts auch all und iegleich in den hie unden begriffen beru^effungen benennt, die solh sach samenttlich oder sunderlich beru^ert in mu^eet und willen sich zu beru^effen und zu appellieren in ainer papieren zedel ainer appellation, die er dann in seinen hannden hielt, offenlich zeigt und einlegt, auch von worten zu worten uberlasse, beru^efft und appelliert,¹ bat apostel oder zeugnisbrief auch sunst und annders sagt er, als in derselben appellation zedel hie unden von wort zu wort begriffen ist und innhellt, der innhalt hernach vollgt und lawt also: Wann der heiligen va^etter gesetz zu erkennen geben, das mit gutten ennd nicht mug volbracht werden, das mit bo^esem anbegŷnn seÿ angefanngen, und darumb die regel oder das decret Bonifacii sagt, das die lennge der zeit nicht bevestigt, das von anfang in recht nicht krefftig ist, und darumb, was daraus volgt oder angriffen wirdet, billich fur uberma^essig wider geleich und rechtlich ordnung geschehen geachtet, deshalben vil hilf des rechtens den verdruckten und verletzten oder dŷ sich besorgen verdruckt oder verletzt werden, von heiligen vattern heilbarlich sind erfunden, der sich die verdruckten oder belaidigten in volfurung irer sachen gebrauchen und behelffen mu^egen. Hierumb wir Valentin Pernpeckh dechannt, Johanns Eberspeck der ellter und das ganntz capitl des stiffts Passaw dazumal ain capitl machend und bedeutend in mu^eet und willen zu dem allerheiligisten in got vatter unserm herrn, hern Sixten von gotlicher fursichtikait den vierden zu beru^effen und zu appellieren, apostel zu bitten und die sach solher unnser apellation fur den heiligen stul zu Rome zu schieben, auch annders zu tu^en, das dŷe natur der apellation von rechts wegen ervordert und eraischt, fur uns und annder all und ieglich uns anhangend oder anhanngen wellen und bevor ab prela^eten ganntzer briesterschafft und volk der stat und bistumbs zu Passaw undertanen, auch anndern des stiffts geistlichen und weltlichen baider geschla^echt lewtten, in was stannd grads ordens oder wesens die sind, mit vorbehalltung der unwiderru^effung ieglicher annder apellation in diser sach aller beswa^erungen und personen thumbherren officialen gewallthabern und sachfu^erern bottschafften und andern undertanen unser und unnser kirchen zw Passaw oder sunst uns anhengigen oder bestendigen fur sich selbs und von unnsern wegen allenthalben eingelegt oder eingelegten, der wir uns aller gebrauchen, anhanngen und uns der zu behelffen vermaintn statt und vesste zu hallten, des wir uns offenlich betzewgen vor euch offenbarn notarien und zewgen. Hie engegen sagen wir und legen fu^er mit swa^erer klag, wie wol wir vorlanngst von ettlichen vermaintten fursehung wal und besta^ettigung, auch annderen daraus volgund dem hochwirdigisten in got vatter und herrn, herrn Georgen des titels Sannd Lucien in Silice briester cardinal von dem bistumb zu Passaw durch abgang weilent des hochwirdigen in got vatters und herrn, hern Vlrichen bischoven daselbs geledigt durch den vorgenannttn allerheiligisten unsern herrn, als man sagt, ettlicher mass wider unnser ordennliche wal von dem erwirdigen vatter, herrn Fridrichen Mawrkircher, baider rechten lerer, des durchlewchtigen fursten und herrn, herrn Georgen pfalczgraven beÿ Rhein und herczogen in Nidern und Obern Bairen canntzler etc., getan fur sein heilickeit ubel bericht bas zu underrichten geapelliert haben, die sachen und peswa^erung in derselben appellation in recht gegru^endt aufgekla^eret furgelegt und fur den babstlichen stuel geschoben auch uns den stifft Passaw sein undertan stifftlewt vorgenannt geistlich und weltlich, auch alle und ieglich hab und gut unser des stiffts und aller vorgenannten varennds und aufligends in schutz und scherm des vorgenantten unsers allerheiligisten herrn pabsts und dem heiligen pa^ebstlichen stu^el untterborffen, auch ettlich vermaint babstlich bullen von wegen des bemellten erbirdigen herrn cardinals ungepu^erlich ausganngen straf und pein darin begriffen, auch die krafft und ubung derselben durch solh unnser apellation angehenngt und die appellation in zeit des rechten verkundet und sunst, sovil an uns steet und wir getan mu^egen, auch von rechts wegen sullen volfuret haben, die wir auch in diser gegenburtigen unnserer appellation vernewen und vernewet, auch widerumb eingelegt haben wo^ellen, des wir uns offennlich betzewgen. Der innhallt von wort zu wort hernach vollget und ist also: Folgt übersetzt nr. 1932 von Immortalis deus bis zum Schlusse.

Source Fulltext: FUCHS, Göttweig III (=FRA II/55, Wien 1902) S. 168-171