Iohannes¹ miseracione divina tituli sancte Sabine sacrosancte Romane ecclesie presbyter cardinalis de Aragonia ac sancte sedis apostolice legatus ad regnum Vngarie et partes eiusdem dependentes a latere electus confirmatus et missus, dilectis filiis Iohanni Pausswangl decano, decretorum bacalario, et Alexio de Yglauia, canonicis et administratoribus episcopatus Olomucensis ecclesie sede vacante² etc. Conquestus est per humilem supplicacionem nobis designatam magnificus et generosus vir dominus Iohannes dominus de Sownicz baro, quod humilis abbatissa domina Cecilia et conventus totus eiusdem abbacie ordinis fratrum minorum in preurbio Olomucensi nituntur eis gravare et ad aliqua dampna inconsueta deducere, propter que idem dominus Iohannes supplicans multum gravatur et opprimitur in tantum, quod eandem dominam abbatissam et totum eius conventum intendit dominus idem Iohannes trahere in causam iusticie. Volentes propterea easdem partes ad bonam pacem et bonam interveniri concordiam, quare discrecioni vestre per nostra scripta apostolica mandamus. quatenus vocatis, qui fuerint evocandi, et propositis hincinde utriusque partis auditis, quod iustum fuerit, appellacione remota atque quibuscumque etiam usuris cessantibus et remotis decernatis facientesque, quod decreventis, per censuram ecclesiasticam firmiter observari. Testes autem, qui fuerint nominati, si se gracia odio vel timore subtraxerint censura, simili appellacione cessante compellatis veritati testimonium perhibere. Quod si non omnes hiis exequendis potueritis interesse, nichilominus tamen unus vestrum exequatur. Datum in civitate Olomucensi vicesimo tercio die novembris millesimo quatercentesimo octuagesimo tercio, pontificatus sanctissimi in Christo patris et domini nostri, domini Sixti divina providencia pape quarti anno decimo tercio.

Source Fulltext: FUCHS, Göttweig III (=FRA II/55, Wien 1902) S. 215