Reverende pater! Post commendationem comparuit in Urbe dominus Iacobus, plebanus in Halpach, vestri nomine corporale cum facelletis ac paramentis presentando, pro quo gratias vobis refero immensas. Qui ex quo ut asseruit dominum Rupertum Speghel, procuratorem domini episcopi Pataviensis acceperat, ne apud eundem episcopum ut vester sollicitator incusaretur in sui periculum, ad me declinavit, memoriam presentavit, quam dum prefato magistro Ruperto ostenderem, respondit: frater Iohannes, ut vestra p. novit, post longa ulcera martiriaque mortem obiit. Episcopus Pataviensis ut scitis nil novi attemptavit nisi rescriptum quoddam, cuius vigore nunc forsan abbas citatus est. Si aliam citacionem contra episcopum petat super iniuriis per rescriptum, fatuum est, nisi mandatum mittat et committatur in rota. De aliis impetrandis iuxta memoriale absque pecunia effici possit nichil. Scribit ibidem de ducentis LX ducatis, quos olim cum suo mandato de banco accepi et frater Io(annes) et ego computum remisimus. Bulla exemtionis, quam vestra p. obtinuit, stat in camera, pro iocalibus et ducatos XXIIII. Hec et similia satis frigide respondit cum aliis, que sileo. Reverende pater! Quod in Salzburga ad vestram concordiam nil factum sit et quod vestros clericos ordinare, loca consecrare seu reconciliari^a recuset episcopus, parvi facio. Habitis enim bullis vestris, quas propter resistencias procuratorum episcopi laboriosissime plus quam anno integro obtinere desudavi, mittatis vestros ad alias dioceses, utamini officio suffraganeorum aliorum et quamquam pro infamia vestra multiplici continuata de vestra emerenda disperaret dominus Rupertus et frater Io(annes) defunctus et ego ita, quod dispensacionem a me expeteret frater ille, quod absque vestra licentia ad Sacrum Specum se transferre posset. Nunc tamen ex quo dominus Iacobus vestram p. laudat et ego in vestro memoriali reperio, quod monachos bene institutos ad vestrum monasterium reformandum postulatis, animum resumpsi et si bancarius de Focker habitis facultatibus huiusmodi respondere voluerit ut promittit, expediam et mittam et si litigare in rota et vos defendere placuerit, si mandatum miseritis cum instructione, etiamsi Specghel noluerit, ego substituam et vos defendam contra episcopum et quoscumque confisus. quod talis ex nunc erit vestra conversatio, ut nullam verecundiam exinde reportare debeam. In domino Iesu feliciter valete! Ex Urbe ultima iunii anno 1499.||
Wilhelmus abbas Lucenburgensis, generalis visitator et procurator etc.

Source Fulltext: FUCHS, Göttweig III (=FRA II/55, Wien 1902) S. 362-363