Lucius episcopus seruus seruorum dei dilectis filiis Henrico abbati monasterii Sancte Marie de Sancta Cruce eiusque fratribus tam presentibus quam futuris regularem vitam professis in perpetuum. Religiosam uitam eligentibus apostolicum conuenit adesse presidium, ne forte cuiuslibet temeritatis incursus aut eos a proposito reuocet, aut robur, quod absit, sancte religionis infringat. Eapropter dilecti in domino filii uestris iustis postulationibus clementer annuimus et ad exemplar felicis recordationis Innocentii pape predecessoris nostri prefatum monasterium Sancte Marie de Sancta Cruce, in quo diuino mancipati estis obsequio, sub beati Petri et nostra protectione suscipimus, et presentis scripti priuilegio communimus. In primis siquidem statuentes, ut ordo monasticus, qui secundum deum et beati Benedicti regulam atque institutionem Cisterciensium fratrum in eodem monasterio institutus esse dinoscitur, perpetuis ibidem temporibus inuiolabiliter obseruetur. Preterea, quascumque possessiones, quecumque bona prefatum monasterium in presentiarum iuste et canonice possidet, aut in futurum concessione pontificum, largitione regum uel principum, oblatione fidelium, seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis. Locum ipsum, in quo prescriptum monasterium situm est cum omnibus pertinentiis suis. Grangiam de Satelbac, et aliam de Satelbac, Grangiam de Brumgesuelde, Grangiam de Volchenuelde, Grangiam de Drumou, Grangiam de Minchendorph, Grangiam de Sigenuelde et Sulze, Grangiam de Talarn, cum omnibus earum pertinentiis. Sane labor uestrorum, quos propriis manibus aut sumptibus colitis, siue de nutrimentis animalium uestrorum nullus a uobis decimas exigere uel extorquere presumat. Liceat quoque uobis clericos uel laicos e seculo fugientes liberos et absolutos ad conuersionem recipere et eos absque contradictione aliqua retinere. Prohibemus insuper, ut nulli fratrum uestrorum post factam in eodem loco professionem fas sit absque abbatis sui licentia de eodem discedere, discedentem uero absque communium litterarum cautione nullus audeat retinere. Paci quoque et tranquillitati uestre paterna sollicitudine prouidere uolentes auctoritate apostolica prohibemus, ut infra clausuras locorum seu grangiarum uestrarum nullus uiolentiam uel rapinam, furtum commitere, ignem apponere, hominem capere uel interficere aliqua temeritate presumat. Decernimus ergo, ut nulli omnino hominum fas sit, prefatum monasterium temere perturbare, aut eius possessiones auferre uel ablatas retinere, minuere, seu quibuslibet uexationibus fatigare, sed omnia integra conseruentur eorum, pro quorum gubernatione ac sustentatione concessa sunt, usibus omnimodis profutura, salua sedis apostolice auctoritate. Si qua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit, secundo tertioue commonita, nisi reatum suum congrua satisfactione correxerit, potestatis honorisque sui dignitate careat, reamque se diuino iudicio existere de perpetrata iniquitate cognoscat, et a sacratissimo corpore ac sanguine dei et domini redemptoris nostri Jesu Christi aliena fiat, atque in extremo examine districte ultioni subiaceat. Cunctis autem eidem loco sua iura seruantibus sit pax domini nostri Jesu Christi, quatenus et hic fructum bone actionis percipiant, et apud districtum iudicem premia eterne pacis inueniant. Amen atque amen. † Ego Theodinus Portuensis et Sancte Rufine sedis episcopus m/p. † Ego Heinricus Albanensis episcopus m/p. † Ego Theobaldus dei gratia Hostiensis et Velletrensis episcopus m/p. † Ego Johannes tituli S. Marci, presbyter Cardinalis m/p. † Ego Laborans Presbyter Cardinalis Sancte Marie Trans Tiberium tituli Calixti m/p. † Ego Flandulfus presbyter Cardinalis tituli basilice XII Apostolorum m/p. † Ego Albinus presbyter Cardinalis tituli sancte Crucis in Jerusalem m/p. † Ego Melior presbyter Cardinalis Sanctorum Johannis et Pauli tituli Pamachii m/p. † Ego Adelardus tituli Sancti Marcelli, presbyter Cardinalis. † Ego Gratianus Sanctorum Cosme et Damiani Diaconus Cardinalis m/p. † Ego Soffredus Sancte Marie in via lata Diaconus Cardinalis m/p. † Ego Rolandus Diaconus Cardinalis Sancte Marie de Porticu m/p. † Ego Petrus Diaconus Cardinalis Sancti Nicolai in carcere Tulliano m/p. † Edo Radulfus Diaconus Cardinalis Sancti Georgii ad uelum aureum m/p. Datum Verone per manum Alberti, sancte Romane ecclesie presbyteri Cardinalis et Cancellarii. VII. Idus Septembris. Indictione IIII. Incarnationis dominice anno M.^o CLXXX.^o V.^o Pontificatus uero domini Lucii pape III. anno quarto.

Source Fulltext: WEIS, Heiligenkreuz (=FRA II/11, 1856) S. 13-15