Ego Liupoldus dei gracia dux Austrie et Stirie notum omnibus esse volo tam presentibus quam futuris, quod monachi sancte crucis in tribus placitis meis querimoniam mihi fecerunt istius modi. Rudgerus Dumo, ut dicebant, omne patrimonium suum in ulricheskirchen, videlicet domum suam et duas villicales curias et viginti octo curtilia, in wilrates sex mansus et dimidium, in porinstorf tres mansus, in alrichestorf mansum et dimidium, hec inquam omnia cum pratis et silvis et omnibus pertinentiis deo et beate Marie in sancta cruce delegavit, hoc nimirum modo eaque conditione, ut, si Adelheidis filia sua sine liberis obiret, in usum fratrum deo in sancta cruce servientium iure perpetuo cederent. Itaque fratres ipsi conquesti mihi sunt, quod eadem Adelheidis, cum non habeat liberos, paterni patrimonii partem vendiderit, partem inpignoraverit, partem reliquam Chunrado secundo marito suo contulerit. Ad hec, cum in quarto placito responsura foret, egoque finalem super his daturus essem sententiam, mittens Chunradus abbatem sancte crucis in domum suam vocavit, talisque inter eos assentiente Adlheide facta est compositio, ut partem illam prediorum, que inpignorata fuisset, abbas et conventus sancte crucis quinquaginta talentis redimeret, atque ex his vero tres mansus in porinstorf, in wilrates curtile unum, et in ulricheskirchen duo curtilia in possessionem mox acciperet, cetera vero Chunradus et adlheidis toto vite sue tempore possideant, ita tamen, ut neque vendendo, neque inpignorando, neque ullis aliis modis aliquid ex eis a sancta cruce debeant abalienare, sed post mortem amborum ad sanctam crucem libere et absolute pertineant, etiam si Chunradus ex alia uxore liberos procreaverit. Pactum etiam est, ut ea, que Chunradus vendidit, id est in alrichestorf mansum et dimidium, et in kogelbrunnen villicalem curiam, abbas, si iusta querimonia potest, requirat et recipiat. Talis itaque pactio cum inter eos constituta fuisset, Chunradus in sanctam crucem veniens pactionem ipsam confirmavit, cunctaque predicta predia super aliare sancte Marie delegavit. Posthec wienne coram me tam pactionem quam delegationem confessus est, confessa est etiam Adelheidis omnia hec sua voluntate facta, et idcirco mea quoque auctoritate confirmata sunt, per presentem paginam ac sigilli mei inpressionem testiumque adhibitionem, quorum nomina hec sunt Heinricus comes de Lechesmunde, Wernhardus de Scowenberc, Vlricus de Peccahe, Kolo de Truhsen, Wigandus de Klamme, Hermannus de Kranechperc, Marquardus de Hintperc, Heinricus de Stritwisen, Kadoldus de Veldesperc et Wichardus frater eius. Dietricus de Liehtensteine, Hadmarus de Sunnenberc, Hugo de Molanstorf, Heinricus de Ulricheskirchen, Irenfridus de Hintperc, Ulricus de Wolfgerestorf, Albero de Alberdorf et multi alii. Actum Wienne in capella Gotfridi camerarii anno dominice incarnationis M.°CC.°VII.° V.° idus Marcii.

Source Fulltext: WEIS, Heiligenkreuz (=FRA II/11, 1856) S. 37-38