In nomine sancte et indiuidue trinitatis. Manegoldus dei gratia Patauiensis episcopus uniuersis christi fidelibus presentis etatis et future generationis in perpetuum. Quicquid precedentium pie utiliterque patratum est industria, succedentium debet et fauore complecti, et scriptorum in ulterius destinari testimonio; ne uetustatis uel obliuionis incuria contingat aboleri, quod memoria perpetua fuerat retinendum. Innotescat ergo memoriter cunctis cartam hanc legentibus, quod uenerabilis aquileiensis patriarcha Wolkerus, cum patauiensi cathedre presideret, concambii iure comunicato una cum pie recordationis Liupoldo duce Austrie ac Stirie sapientum consilio in eo conuenerunt, ut, quidquid ipsum ducem iuris habere constaret in Swabdorf et Uischamunde, nec non et in nivsidele, ad patauiensem episcopum et ecclesiam de cetero pertineret, uersaque uice ecclesiam uille, que dicitur inferior Sulce, quam patauiensis ecclesia donatione Sighardi et Heinrici comitum de Schala cum omnibus pertinentiis et iure patronatus canonice possederat, potestati ducis prefati pari iure episcopus contulit. Contigit autem, ut idem dux eandem ecclesiam cum ipsa uilla, quam et ipse a memoratis comitibus hereditatis iure susceperat, monasterio ac fratribus in sancta cruce pro salute et remedio anime sue parentumque suorum pro supplendis eorundem fratrum stipendiis libera donatione conferret, et predictus episcopus ipsis fratribus pro parte sua condescendens perenni iure ipsis concessit, ut, quemcumque sacerdotem ipsi in eadem ecclesia instituerint, stipendiis ab eis conuenienter sibi designatis, uidelicet in ipsa uilla Sulce manso uno, qui est de dote ipsius ecclesie, et in ertprust decem mansorum decimis, contentus permaneat, nec ulterius quicquam sub cuiusquam iuris nomine exigat uel requirat. Ceterum institutus ab eis et per manus episcopi inuestitus si iniunctum sibi ministerium indebite administrauerit, eisque rebellis esse uoluerit, licebit ipsis, eum coram nobis uel archidiacono permutare probatis eius insolentiis, aliumque in locum eius lege prescripta subrogare. — Preterea sepe dicti fratres de sancta cruce pomerium cum molendino in uilla nostra Swabdorf habebant, que utraque domui nostre, quam ibidem habemus, adeo sunt uicina, ut neutro illorum carere possimus, et idcirco pro eorum recompensatione fratribus ipsis predia duodecim solidos annuatim soluentia in Ringelinsdorf sita contulimus, uidelicet mansum et dimidium; que tamen predia prepositus sancti ypoliti ad se pertinere dicebat, sed rogatus a nobis omni iuri, quod in eis habere uidebatur, in manus nostras bona uoluntate renuntiauit, et hoc in niwenburc astantibus scilicet Wecelone abbate de Kotwico, Wernhero abbate de sancta cruce, Marquardo abbate de Zwetel, Ulrico chori nostri cellerario, Hartmanno chori nostri canonico. Ita ergo memoratos fratres fecimus predia illa libere ac sine contradictione possidere. Ut igitur cuncta, que predicta sunt, rata in perpetuum fixaque permaneant, presentem paginam sigilli nostri inpressione roboramus, et, ne quis ei temere contraire presumat, sub anathematis uinculo denuntiamus. Testes quoque subscribi facimus, quorum hec sunt nomina. Sighardus archipresbiter et prepositus sancti ypoliti, Otto prepositus sancti floriani, Ulricus chori patauiensis cellerarius, Heinricus de poumgarten, Hartmannus. De laicis. Heinricus comes de berge. De ministerialibus nostris. Manegoldus de Schonenbuhele, Otto de walde, Kalhochus marschalcus noster de grazberc, Heinricus de Wolfbeizzingen, Chunradus de Isowe, Heinricus de Wizmannesdorf, Arnoldus et Ernestus de sancto ypolito. De ministerialibus ducis. Ortolfus de Rammensteine et Chunradus frater eius. Datum apud sanctum ypolitum anno ab incarnatione domini M.°CC.°VIIII.° Indictione XII.^a Anno pontificatus nostri IIII.° X.° kalendas Mai per manus Chrispiani notarii.

Source Fulltext: WEIS, Heiligenkreuz (=FRA II/11, 1856) S. 40-41