In nomine sancte et indiuidue trinitatis. Eberhardus dei gracia Salzburgensis archiepiscopus apostolice sedis legatus in perpetuum. Etsi ecclesiarum omnium et locorum piorum Salzburgensis metropoleos iugis in uisceribus nostris quasi ex debito intendatur profectus, specialius tamen id debitum prestare nos eis conuenit, in quibus amplioris religionis exercicium fama teste et experientie ueritate uigere pre aliis perhibetur, cum et secundum apostolum doceamur, seminare in terris, que multiplicato fructu recolligere debeamus in celis. Nos predictorum respectu pro nostra et successorum nostrorum memoria congregationi de sancta cruce in Austria Cisterciensis ordinis de capituli nostri consensu reali et liberali donatione concessimus in perpetuum de salina nostra in Mulbah, donec tamen salis decoctio ibi durauerit, libras tres nudi salis per offïciales nostros, qui pro tempore fuerint, eidem domui sancte crucis annis omnibus exsoluendas. Sed, ne hec donatio propter temporis diuturni elapsum in obliuionem, que etiam in bene actis calumpniarum frequenter et litium suscitat materiam, prolabatur, quia sollers antiquorum prudentia isti incommodo scripture remedium adinuenit, nos ad eliminandum omne, quod super hoc in futurum oriri posset dubium, presentem paginam inde conscriptam sigillo nostro concessimus conmuniri. Testes quoque, qui donationi interfuerunt, eidem fecimus subnotari. Hi sunt Rudegerus Kimensis episcopus, Albertus prepositus, Chuno decanus, Hoholdus custos Salzburgensis, magister Heinricus Soliensis, magister Bernhardus Frisacensis prepositi, magister Vlschalcus plebanus de Muldorf, magister Vlricus canonicus Frisacensis, Guntherus capellani, Gerhohus de Percheim, Rudgerus de Saluelden, Heinricus et Chunradus fratres de Trvhtleichingen, Vlricus marescalcus, Marquardus de Hvnesberc‚ Wernherus de Lengenvelde, Heinricus de Schernberge. Acta sunt hec anno domini Millesimo CC.°XXX.° indictione III.^a Data per manus Heinrici notarii nonis Januarii.

Source Fulltext: WEIS, Heiligenkreuz (=FRA II/11, 1856) S. 73