In nomine sancte trinitatis et indiuidue vnitatis. Andreas dei gracia Hungarie, Dalmacie, Crohacie, Seruie, Rame, Lodomerieque rex viris religiosis abbati et conuentui sancte Marie de Monte Cisterciensis ordinis eorumque successoribus in perpetuum. Per presens scriptum omnibus nunc et in posterum facimus manifestum, quod olim affectu misericordie prouocati mille Zuanos salium magnorum, que in curribus deferuntur ad confinia Theotonie, pro remedio anime nostre successorumque nostrorum et regni nostri salute monasterio uestro in Suprun contulimus in perpetuum annuatim; et, ut nostra largicio solidaretur amplius, statuimus auctoritate regali, quod, si salinarii de Suprun dare uobis noluerint sales predictos, comes uel curialis comes, qui in Suprun illo tempore fuerit, auctoritate nostra cum iudicio ab eis accipiat, et ecclesie uestre sine aliquo dampno totaliter tribuat mille Zuanos, quam piam collacionem nunc et in futurum ratam habemus et regali auctoritate ex certa sciencia confirmamus, promitentes, per nos nostrosque successores obseruare et facere obseruari, quod superius est expressum, et in priuilegio ecclesie uestre a nobis concesso similiter continetur. Et iuxta composicionem, que inter venerabilem patrem dominum Jacobum Prenestinum electum apostolice sedis legatum ex una parte, et nos ex altera intercessit, hanc damus uobis et uestris successoribus libertatem, ut de predictis salibus ad usus uestros tantum retineatis, quantum tu abbas in anima tua iuraueris salinariis. Ceteri uero uel pars ipsorum, cum uobis fuerint persoluti, libere et absque ulla contradictione in domo uestra sub sigillo salinariorum nostrorum et prelati uestri, qui pro tempore fuerit, deponantur, depositique seruentur usque ad octauas sancti Stephani regis et tunc ab illo die usque ad natiuitatem beate virginis faciemus uobis solui argentum pro salibus, quos apud uos habebitis, pro singulis centum Zuanis unam marcam, et si in illo termino nos aut salinarii nostri sales ipsos non emerimus et uobis et ecclesie uestre argentum secundum dictam estimacionem non soluerimus, ex tunc omni tempore omnes sales illos libere in proprium usum ecclesie uestre percipiatis. et uendatis iuxta uestre arbitrium uoluntatis, et omne lucrum, quod deberemus nos, uel alius rex, qui pro tempore fuerit, uel ipsi salinarii inde percipere, totaliter cedat in usus ecclesie uestre, nec a salinariis ipsis, ueteribus seu nouis, aut aliis personis permittemus uos molestari, nec nos ipsi molestabimus‚ quin possitis quicquid uobis placuerit facere de salibus ipsis‚ ex quo in dicto termino non fuerit uobis pecunia persoluta. Idem dicimus de secundo termino, uidelicet quod a festo beati Nicolai usque ad festum sancti Thome apostoli pro salibus, quos in domo uestra apud uos habebitis sub sigillo salinariorum et prelati uestri, faciemus uobis solui argentum secundum estimacionem superius anotatam. Quod si factum non fuerit, uolumus, quod idem fiat, quod in casu superiori de salibus primi termini dictum est. Argentum uero, quod uobis faciemus solui, erit in bonis Frisitaticis, uel in argento, cuius decima pars conburetur. Vt autem hec nostre confirmacionis et concessionis et libertatis pagina robur perpetue obtineat firmitatis, contra quam scienter non ueniemus, nec contra priuilegia monasterio uestro a nobis aut predecessoribus nostris indulta, regio sigillo eam uolumus communiri statuentes, ne nos, aut nostrorum aliqui successorum, uel aliquis alius contra ea quicquam audeat attemptare, uel ei ausu temerario contraire. Datum per manus reuerendi patris Vgrini, Colochensis archiepiscopi, aule regie cancellarii anno ab incarnacione domini M.° CC.° XXX.° III.° Indictione VI.^a Kalendis Octobris‚ regni uero nostri anno XXX°. Presidentibus Roberto venerabili Strigoniensi archiepiscopo, Bartholomeo Quinque ecclesiensi, Briccio Waciensi, Bartholomeo Wesprimensi et ceteris (sic).

Source Fulltext: WEIS, Heiligenkreuz (=FRA II/11, 1856) S. 295-296