Gregorius episcopus seruus seruorum dei dilectis filiis abbati et conuentui monasterii sancte crucis de Austria Cisterciensis ordinis Patauiensis diocesis salutem et apostolicam benedictionem. Cum a nobis petitur, quod iustum est et honestum, tam uigor equitatis, quam ordo exigit rationis, ut id per sollicitudinem officii nostri ad debitum perducatur effectum. Ea propter dilecti in domino filii uestris iustis postulationibus grato concurrentes assensu decimas, quas in parrochia de Alecht bone memorie Regenmarus Patauiensis episcopus loci diocesanus spectantes ad ipsum capituli sui accedente consensu monasterio uestro pia et prouida liberalitate concessit, prout in ipsius litteris confectis exinde dicitur plenius contineri, sicut eas iuste ac pacifîce possidetis et in alicuius preiudicium non redundat, uobis et ipsi monasterio per uos auctoritate apostolica confirmamus et presentis scripti patrocinio communimus. Nulli ergo omnino hominum liceat, hanc paginam nostre confirmationis infringere, uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Perusii VI.° idus Februarii, pontificatus nostri anno octauo.

Source Fulltext: WEIS, Heiligenkreuz (=FRA II/11, 1856) S. 85