Rvdegerus dei gracia patauiensis episcopus ivdicibus et mvtariis suis tam patauie quam in aliis locis circa danubium et enum consistentibus graciam suam et omne bonum. Scire uos uolumus, quod dilectis in christo fratribus abbati et conuentui de sancta cruce in Austria de consensu capituli nostri concessimus, vt in omni possessionis nostre loco naues salem et alia, quocumque censeantur victualium nomine, ad ipsos spectantia deferentes singulis annis per danubium descendentes ab omni exactione sint libere. Vobis ergo precipiendo mandamus, ne ab ipsorum nauibus quecumque victualia deferentibus neque thelonium, neque mvtam, nec de transitu, quod vuruart appellatur, neque ullius iuris nomine quidquam exigatis, aut exigi permittatis et in sortem pensionis nostre, quidquid de nauibus supradictis uos recepturos speraueritis, nobis computetis. Siquis forte de Austria aut etiam de uectoribus eiusdem salis alicui nostrorum aliquid debuerit, propter hoc abbas et conuentus sancte crucis in nullo grauentur aut molestentur, sed res eorum libere abire permittantur. Et vt hec nostre donationis indulgentia ecclesie dicti conuentus debeat inuiolabiliter obseruari, eandem robore litterarum presentium confirmamus, quas et nos ipsi ecclesie damus in testimonium et cautelam. Datum apud Euerdingen in octaua Martini, anno domini Millesimo CC.°XL.° V.°

Source Fulltext: WEIS, Heiligenkreuz (=FRA II/11, 1856) S. 110