In nomine sancte et indiuidue trinitatis amen. Ut acta salubria ab hominum non decidant memoria, scripture testimonio debent cautius solidari, ne per liuores derogantium aliqua mentis imbecillitas super ea oriatur per quam talium actuum confirmatio fiat in posterum annullata. Per presentium igitur continenciam manifestum fieri uolumus vniuersis nos fr. S. dictus abbas sancte crucis, quod dominus Heinricus de Merschwanch et filius eius dominus Johannes pro remedio domine Mahtildis vxoris domini Heinrici, nec non et domine Gysle vxoris domini Johannis in elemosinam nobis quindecim talenta denariorum contulerunt tali condicione mediante, vt de ipsis denariis predia comparentur, de quorum redditibus in die anniuersario prefate domine Mehtildis felicis memorie, videlicet in die beati Mathie, nostro conuentui in piscibus et in vino, sicut aput nos actenus est consuetum, plenarie seruiatur. Quamdiu vero dicta predia non fuerint comparata, de nostris bonis, videlicet de duobus mansis in Livbansdorf duo talenta soluentibus, antedictum seruicium compleatur. Vt autem hec ordinatio robur obtineat firmitatis, presentem paginam nostro sigillo fecimus comuniri. Actum anno domini M.°CC.°L.°IX.° in sancta cruce consencientibus fratribus vniuersis.

Source Fulltext: WEIS, Heiligenkreuz (=FRA II/11, 1856) S. 146-147