Ego Rudgerus dictus Neztaher tenore presentium uniuersis profiteor et contestor, quod, cum ego et frater meus Hainricus sororque nostra Liebhildis XL. denariorum redditus de quadam uinea sita in sazz, que Neztahaer uocatur, iure hereditario communiter haberemus, exclusis hominum honestorum testimonio germanis meis Heinrico et Liebh. redemptisque per concambium partibus eorum aliis hereditatis nostre rebus predictos redditus simul cum proprietatis iure cepi solus, tranquille ac libere possidere. Cum igitur alicuius necessitatis articulo imminente sepedictos redditus cuidam uiro nomine Heinrico in Paden iuxta ecclesiam beate Marie uirginis residenti, qui eandem uineam a me tenuit iure ciuili, quod uulgo purchreht dicitur, sub nomine meo ac dilecte coniugis mee*) liberos ex me tunc non habentis pro XV. solidis uendere placuisset, ius proprietatis, quod in ipsa uinea habui, ob salutem meam et progenitorum meorum ecclesie sancte crucis ordinis Cysterciensis et fratribus ibidem deo seruientibus in perpetuum pleno iure contuli possidendum, assumens mihi dictis fratribus promittendo, quod contra omnem impeticionem predicte coniugis mee*), sev futurorum liberorum meorum, uel etiam germanorum meorum Heinrici et Liebh. siue omnium, quorum ad consensum intererat dextras dare iuxta communem terre formam, opponere me debeo defensorem. Quod si non fecero uel facere nequiero, dimidiam partem curie nostre site in Neztah, que me contingit, obligo pro equipollencia XV. solidorum, que ebentewr uulgariter dici potest. In cuius rei testimonium uirorum nobilium domini Ulrici de Ror et domini Friderici dicti Raedler sigillis presentes uolui roborari. Testes uero sunt Ulricus de Ror, Fridericus Raedler, Otto de Paden, Ulricus Holzer, Ortolfus Murrel, Chunradus de Taehnstain, Henricus frater suus et alii quam plures.

Source Fulltext: WEIS, Heiligenkreuz (=FRA II/11, 1856) S. 149-150