Vt facta nostra luce cognitionis publice omnibus manifestius elucescant, nos frater Heinricus dictus abbas in sancta cruce huius scripti euidentia transfundimus in memoriam omnium tam presentium quam futurorum, quod nos prehabito nostri conuentus assensu et consilio saniori per manus fratris Dietmari tunc domus nostre cellerarii et fratris Heinrici laici conuersi nostri, quibus hoc negocium comissum fuerat, Eberhardo et Liukardi vxori sue, a priore marito suo cognomen Wahtterin trahente, nec non filio eorundem Gotfrido curtem nostram sitam in Tribanswinchel cum omnibus suis appendiciis sub iure donationis ciuilis iuris locauimus tali modo, quod ab ipsis annis singulis quintum dimidium talentum denariorum duobus anni temporibus, in festo uidelicet beati Mychahelis XVIII.° solidi, et in purificatione beate virginis XVIII.° solidi de predicta curte soluantur domui sancte crucis; hoc addito, quod iam dicte domui triginta modios grani annuatim molere tenebuntur, nec premissos memorate pensionis terminos transgredi licebit aliqualiter nisi assensu nostro beniuolo annuente, alioquin cessante omni huius conuentionis pacto prefata curtis nostra ad domum sancte crucis denuo reuertetur. Sed et hoc duximus inserendum, quod nos huius curtis occasione speciali dudum premissas personas ad nostra placita, que vulgo Pantaidinch vocantur, non tenebimur coartare. In cuius rei firmitatem presentem litteram conscribi placuit et sigillo domni Chvnradi de Walchunschirichen castellani Medlycensis subnotatis testibus roborari, qui sunt, dominus Otto Tvrso, dominus VIricus de Ror, dominus Albero de Paden, dominus Wichardus de Trybanswinchel, dominus Vlricus Matzo, dominus Chunradus de Walchunschirichen, Engelschalcus de Sultze, et alii quam plures. Acta sunt hec anno domini M.°CC.°LXXI.°

Source Fulltext: WEIS, Heiligenkreuz (=FRA II/11, 1856) S. 179-180