Ego Ditmarus dictus de Paumbgarten presencium profiteor vniuersis, quod de consensu filiorum meorum Dyetrici et Dyetmari pro remedio anime mee, progenitorum successorumque meorum donaui et tradidi monasterio sancte crucis abbati et fratribus ibidem deo seruientibus duorum talentorum redditus in villa, que dicitur in nider Leyz, super manso, qui dicitur Walchuni, et quadam area Pertoldi secundum quod ad me proprietatis titulo pertinebant, tradidi inquam iure perpetuo possidendos tali condicione annexa, quod eorumdem duorum talentorum LX. denarios singulis annis tempore vite mee ex nunc predicti abbas et fratres annis singulis recipere tenebuntur in possessionis et donacionis mee euidens argumentum; post vite vero mee decessum predicti duorum talentorum redditus integraliter extunc et in posterum monasterio persoluentur. Debent quoque predicti abbas et conuentus ex huius pacti debito, postquam ipsis mors mea fuerit nunciata, per se ipsos et vecturam suam propriam, vbicumque infra terre istius limites inuentus fuero, corpus meum recipere cum panno bono pro funeris opertura, et secundum mei status decentiam honoremque monasterii in sepulchris patrum meorum honorifice sepelire. In huius rei testimonium presentem litteram fecimus nostri sigilli munimine communiri. Testes autem sunt hii, dominus Hainricus de Chvnring, Albertus de Clemens, Wickardus de Paumgarten, Jacobus Chastner. Acta sunt hec anno domini M.°CC.°LXXXIIII.° XV.° kalendas Nouembris.

Source Fulltext: WEIS, Heiligenkreuz (=FRA II/11, 1856) S. 237-238