Nos Rebischius de Boberawe, Egidius filius suus, Albertus de Donika gener Rebischii, nec non Sophia uxor eiusdem Alberti et filia Rebischii memorati ad uniuersorum tam presentium quam futurorum notitiam cupimus peruenire, quod manu communicata et vnanimi uoluntate vendidimus religiosis uiris Berhtoldo abbati et conuentui sancte crucis in Austria Cisterciensis ordinis tres laneos siue mansos ad nos proprietatis iure spectantes sitos in uilla dicta Ringerndorf uille Pirbovm contigua seu vicina, reddentes in annuo censu tres libras denariorum wiennensium in festo beati archangeli Michahelis pro triginta talentis denariorum pecunie numerate monete wiennensis predicte, quam pecuniam nos integraliter percepisse recognoscimus ac in utilitatem nostram esse conuersam. Promittentes abbati et conuentui memoratis sub ypotheca omnium bonorum nostrorum, dictos tres mansos ab omni impeticione defendere ac tueri, et, si eosdem ab ipsis a quoquam euinci contingeret, aliis bonis nostris equiualentibus compensare et omnino seruare indempnes. In cuius uenditionis nostre congrue testimonium et munimen nos Rebischius et Egidius supradicti et ego Albertus uxoris mee Sophie sigillum non habentis nomine sigilla nostra presentibus duximus appendenda. Ego Otto de Hackenberg rogatus a domino abbate predicto sigillum meum apposui in testimonium contractus huiusmodi et consensum. Testes horum sunt, dominus Hermannus de Cranperch, Chunradus de Pylichdorf, Vlricus, Otto et Ditricus filii sui, Ulricus et Ditricus de Wolfgerstorf fratres, Marquardus de Mistelbach, et alii quam plures. Datum Wienne in die beati Marcelli pape et martiris anno domini Millesimo ducentesimo nonagesimo.

Source Fulltext: WEIS, Heiligenkreuz (=FRA II/11, 1856) S. 261-262