Ich Erchenpreht purchgraf von Go^ers vnd ouch mein havsvrowe, vro Sopheya, veriehen offenleich an diesem brief vnd tv^oen chvnt allen den, die diesen brief lesent oder ho^erent lesen, die nv lebent oder hernah chvmftich sint, daz wier mit gv^oetleichem willen vnd mit verdahtem mv^oet einem beschaidem manne Hern Hainreichen dem Chastner von Wienn verchouffet haben im vnd seiner hovsrowen vroven Gaerdrovten einen Weingarten anderhalb ieuch daz Svfring, der vnser vreiez aigen ist gewesen, vmb zwai vnd sibentzich phunt wienner phenning, vnd wir ouch der scho^en vnd vollichleich gewert sein von dem gv^oet, daz di vorgenannten vron Gerdroweten angeho^ert hat alain, vnd ovch mit so getaner beschaidenheit, daz der vo^ergenannt Hainreich der Chastner vnd sein hovsvrowe vro Gerdrowt vreien gewalt des haben schvln‚ daz si den vorgenanten Weingarten vreileich verchouffen, versetzen vnd geben, swem si wellen, vnd allen iern vrumen damit schaffen an allen ierresal also, daz man vns aller iaerleich davon dienen schol ze rehtem perchreht zwen ember weins von dem Weingarten an dem tage, so man den Weingarten liset. Nimt man awer den wein niht an demselben tage, so schvln si in der Stat ze Wienn geben sehtzich phenning vvr den Wein. Ouch lob wier daz baidev, ich Erchenpreht vnd mein hovsrowe di vorgenannt Sopheye, daz wier vns vvr den vorgenanten Weingarten setzen ze rehtem scherm vnd ze gewern, als landes reht ist, vvr alle ansprach. Daz diesev rede vnd diser chouf also staet sei vnd vnverwandelt, darvber geb wier disen brief zeinem sichtigen vrchvnde diser sache vnd bestaetigen den, versigelten mit vnserm insigel vnd mit disen ersamen gezeugen, di hernah bei namen geschriben sint, daz ist, her Rveger von Pokchvlies, Her Wulfinch von Triwanswinchel, her Jacob von Hoy, der do amptman was ze O^esterreich, Her Greiff, Her Chvenrat der Polle purgermaister, Her Paltram der Watze, Mertein, Wernhart der Anman von Svfring, vnd anderr vrumer leut genvech. Diser brief ist gegeben ze Wienn des Jares, do von Christes gebverd sint gewesen Tovsent iar, zwai hvndert iar, in dem zwai vnd Neuntzegisten Jar‚ des dritten tages vor sand Georgen tage.

Source Fulltext: WEIS, Heiligenkreuz (=FRA II/11, 1856) S. 321-322